Mimpi manah enggau mimpi jai

Sekeda gaya mimpi ti suah disebut sida ke tuai iya nya mimpi ringat, mimpi enda gayu, mimpi ditulung antu enggau mimpi ngulit

“Kala mega ninga sida ke tuai nusi dalam bup Sempekat Lama madahka kitai mensia arapka mimpi tang pengarap bemimpi tu nadai ditampung nyentuk sehari tu.”

SRI AMAN: Semua mensia idup ba dunya tu nadai enda bemimpi tang bisi penyelai ba bansa kitai Dayak kelebih agi bansa Iban laban bisi ngembuan pengarap ke mimpi.

Kenu ku peranak Batu Lintang di Undop Sri Aman, Insol Harry, 47 taun, sekalika nya mimpi igau tauka bemimpi tegal mayuh runding, kitai bansa endang pechaya enggau arap amat mimpi mai reti enggau empas besai ba pengidup kitai besehari sehari.

“Kala mega ninga sida ke tuai nusi dalam bup Sempekat Lama madahka kitai mensia arapka mimpi tang pengarap bemimpi tu nadai ditampung nyentuk sehari tu.

ANAK IBAN… Insol (bediri, empat kiba) disempulang bala bukai lebuh bejalai matau menua, belelang ngiga penemu enggau peneleba.

“Taja pia, kitai endang agi arapka reti mimpi tauka kenyap sereta ngasika lalau ari mimpi nya lebuh tauka sebedau ngereja pengawa ke tanah, bemain ba ai, nurun begiga enggau ke bukai nyengkaum ngintu gintir pengawa bumai betaun,” ku Insol.

Nya alai ku Insol, sebedau ngereja pengawa ba babas baka nubai, maku, ngasu, bumai betaun, tauka mindah jauh enggau mayuh pengawa ke bukai, kitai suah agi ngedang kenyap malam nya sebedau ngereja pengawa hari siti.

Kitai deka dulu nanya pemanah kenyap maya dani ari peninduk tumu pagi nya dikena nentuka penyadi enggau pengenda pengawa ti deka dikereja ngambika nyamai nyikap diri nurun ngereja.

“Belebuh mega kitai nanya reti kenyap ngagai sida ke tuai enti orang ke ngempu kenyap agi rapas penemu sentang pekara nya lalu minta lalau baka ni gaya ngintu kenyap.

“Enti kenyap nya bisi nyangkut dia pengawa enda tau enda ditangguh dulu ngagai hari bukai ti ditimpuh baru orang ke ngempu kenyap tauka pun bilik ngatur pengawa.

DAYA IDUP… Pengawa bumai betaun mega begunaka kenyap nentuka idar pengawa meruan sereta diberekat petara.

“Taja ba pengarap baru dipegai bansa Iban sekeda enda tentu arapka kenyap agi laban ba penemu sida nya semina mimpi igau main maya tinduk aja, tang aku meruan nali pengarap sida ke tuai nyentuk diatu,” ku iya madah nyemetak.

Nangkan nya ku iya, sekeda gaya mimpi ti suah disebut sida ke tuai iya nya mimpi ringat, mimpi enda gayu, mimpi ditulung antu enggau mimpi ngulit.

“Mimpi baka tu enda nganu nyawa tang tau diambika manang ngambika besudi tauka belian dikena ngenyamaika ati diri, badu agi rawan sereta enda nangika semengat diri riar.

“Mimpi enda gayu kenu ku sida ke tuai iya nya mimpi ti beserak dalam semalam nya tau ngasuh pandak umur tauka mimpi meda bulan dua iti berebak.

“Pesan sida ke tuai enti enda nyamai ati ketegal mimpi nya tau ngambi manang tauka begawai besai ke tanju tauka berunsut enggau ubat penabar mimpi ngichaka mimpi nya tau rumbau enda bisa agi,” ku iya nerang.

BEDUA… Sekeda ari pengawa ngirah enggau bebagika pengaruh ba gawai besai ti didiri kitai bansa di menua.

Mimpi ditulung antu tau mega dikumbai sumpah antu tu pemadu manah ku sida ke tuai lalu suah agi diberi mayuh macham pengaruh kebal kena bekayau enggau nyadi kaya raja.

Orang Panggau ti diambi mimpi nya endang Petara dalam pengarap bansa Iban ti nentuka nasit enggau pengidup anak mensia anak uda di dunya tu, ku Insol.

“Bebida enggau mimpi ngulit ti suah nyadi, kenyap ti enda manah, ngemai rita bisi penusah nuntung kitai sebilik tauka kaban belayan semak.

“Mimpi ti ngayanka kitai bekenaka ngepan, beminyak, besugu sereta nebah nyawa baka besanggai, bepantun enggau berenung tauka begawai besai tu ngayuka penusah besai deka datai.

“Taja pia, bisi sekeda mimpi ngulit tu tau mega tunsang lalu bemimpika orang ke diulitka sida tau ngasuh orang nya panjai umur tauka gayu,” ku Insol bekunsika penyelai reti kenyap kitai Iban.

NYELAI… Mimpi ngulit, berami besai ti suah ngemai berita enda manah ngagai kitai diri sebilik enggau kaban belayan jauh tauka semak.

Ku iya, baka sekeda mimpi tingkil ngeli, mimpi sarak, mimpi begulai enggau sanu-sanu, mimpi terebai enggau macham mimpi ke bukai nya semina igau kitai aja empa pengelelak enggau pemayuh utai dirunding.

Nya alai ku iya, genap iku kitai mensia jarang enda bemimpi ti dikumbai mimpi igau lalu mimpi baka tu enda dikemanaka sida laban beteladanka pendiau enggau ulah ti suah nyadi ba sida besehari sehari.

“Baka pengawa kami ti bekuntau enggau nampuk penemu, maya begigaka tulung tauka sukung ari petara tauka antu, orang ti enda ulih dipeda enggau maya nyeruga, suah agi deka dipadah nengah kenyap tauka dalam mimpi.

“Kelimpah ari piring ti dibai maya nampuk penemu ba menua ti bisi orang nguan tauka bukit ti beberita, endur orang beniat sekalika minta pengerai, minta pengaruh, minta diri bidik lansik sereta macham utai bukai, mega beguna kenyap sebedau nurun kia,” tandu Insol.

NALI PENGARAP TUAI… Insol Harry.

Suara Sarawak