Pengawa sebaka deka diatur baru di Batu 7 (31 Mei) enggau Batu 8 1/2 (4 Jun) nyerumba Hari Gawai -Raya
“Pengawa tu keterubah iya dipejalai di Petronas Sungai Maong sereta siti ari agih belanja ari sitak Parlimen aku empu (Stampin).”
KUCHING: Urung 500 buah motosikal ngambi peluang ngisi minyak pechuma RM5 ba Stesyen Petronas Sungai Maong, kemari.
Sapit Menteri Dagang Dalam Menua enggau Pekara Bebelika Barang (KPDNHEP) ti mega nyadi Kaban Parlimen (MP) Stampin, Chong Chieng Jen madahka tu diberi beserimbai enggau pengerami Hari Gawai enggau Hari Raya ti deka datai.
“Pengawa tu keterubah iya dipejalai di Petronas Sungai Maong sereta siti ari agih belanja ari sitak Parlimen aku empu (Stampin).
“Tu dikena mantu ngelempung belanja rayat beserimbai enggau pengerami Hari Raya enggau Hari Gawai ti deka datai,” ku iya.
Chong madah munyi nya ba pengarang pemberita pengudah pengawa ngisi minyak di stesyen minyak Petronas Sungai Maong ditu, kemari.
Nangkanka nya, Chong madah pengawa meri minyak ngagai sida ke ngena motosikal enggau enda bebayar tu dipejalai berengkah ari pukul 2 ngagai pukul 4 lemai.
“Rambau 31 Mei tu ila, siti agi pengawa ke sebaka deka dipejalai ba Batu 7 beserimbai enggau pengerami Hari Gawai.
“Udah nya, sehari sebedau pengerami Hari Raya kena 4 Jun, kitai bisi ngatur program ke sebaka ba Batu 8 1/2,” ku iya.
Berebak enggau nya, Chong madah beserimbai enggau dua bengkah pengerami tu mega, mensia mayuh patut ngeripotka pengawa salah ba palan bebelika barang ngagai opis menteri iya.
“Lebuh bebelika barang, endang kitai deka tetemuka pekara baka utai empa ti enda manah lebih agi rambau pengerami.
“Lalu kitai nyadi orang ke meli enggau ngena tau ngeripot pekara nya ngagai opis menteri kami ngambika ulih diputarka,” ku iya.
Sama ngulu pengawa nya Kaban Kaunsil Nengeri (Adun) Pending Violet Yong Wui Wui, Kaban Parlimen Bandar Kuching Dr Kelvin Yii, Menijar Pengawa Dagang Petronas pampang Sarawak, Patrick Lenggang sereta Sapit Direktor KPDNHEP Sarawak Mohd Hanizam Kechek.
