LEBUH kitai nemuai ngagai Bagi Menua Simanggang tunga ngagai Pelilih Mit Engkilili, anang sesekali kitai muai peluang napatka sebengkah palan ti ngundan misteri kediri empu ti bisi dia iya nya Batu Nabau.

Batu nya dikumbai Batu Nabau laban baka gamal ular Nabau iya nya sebengkah ular pemadu besai dalam sejarah enggau cherita kitai Iban kelia.

Batu Nabau nya bepalan ba Sungai Bukong urung 3.2 kilometer (km) penyauh tauka enam minit ari Pasar Engkilili enti ngena entukar.

Tang enti ari Mengeri Simanggang, palan nya urung 39km penyauh tauka 40 minit enti ngena entukar.

Pia mega, enti ari Rumah Panjai Bukong dia empu, palan nya semina 50 meter aja lalu ulih dilawa bedarat.

Lilit pemesai batu nya lebih ari dua meter enggau semilan meter pemanjai pansut ari dalam tanah lalu nya meh ngasuh batu nya enda nyalah baka gamal ular besai.

Taja pen peranak rumah panjai dia enggau ti ngelingi nya udah lama nemu senentang pemisi batu nya tang nya enda ditemu mensia mayuh ba luar sitak nya.

Pemansang teknologi digital enggau kuasa media rama kemaya hari tu mujur ngangkatka palan nya lalu majak ditemu mensia mayuh ba selampur menua enggau menua luar.

Kemaya hari tu, palan nya suah ditapat mensia mayuh ti deka meda penyelai enggau misteri Batu Nabau nya ngena mata tubuh diri empu.
Genap iku temuai ti ngusung Batu Nabau nya chukup alit ati meda pemanah enggau penyelai nyengkaum misteri cherita senentang batu nya.

Kenu ku cherita, bisi siku lelaki peturun Siam ari Kuala Lumpur madahka diri bisi bemimpi senentang Batu Nabau nya lebih ari dua puluh taun ti udah.

Lalu ba mimpi nya, iya bisi meda siku ular besai bebali nyadi batu.

Laban ti arap bendar ngagai mimpi nya, dia deh iya nguji ngiga batu nya ba mayuh bengkah endur nyentuk iya datai ba Pelilih Mit Engkilili lalu tetemu ke Batu Nabau nya.

Berengkah ari nya, cherita senentang Batu Nabau nya ditemu semua orang lalu dikemegauka mensia mayuh.

Pengudah Batu Nabau nya majak ditemu, dia deh mensia mayuh enda muai peluang limpang ngabas Batu Nabau nya lebuh sida bisi nemuai ngagai Pasar Engkilili tauka Mengeri Simanggang.

Pia mega, bisi sekeda datai kia ketegal bisi niat minta nasip manah ngambi bulih duit, bulih ringgit sereta bulih lumur ngasuh jampat kaya.

Bisi mega datai ketegal minta jereki, pengerai, pengelantang, pemujur sereta penyamai ungkup diri empu enggau diri sebilik.

Nampung baru cherita Batu Nabau nya tadi, bisi mega cherita kelia tunga ngagai menua Kalimantan sepiak nyin.

Kenu ku cherita, ba menua sida dia bisi siku ular besai idup ba kampung jerung dia ti dikumbai Nabau urung 30 meter pemanjai sereta bisi ngembuan kuasa nyelai.

Nya alai, sebarang orang ti bisi tetemu ke ular nya deka bulih tuah sereta mayuh jereki laban ukai sebarang orang ulih betemu enggau ular nya.

Nambah ke nya, cherita ba menua tu empu madah, Nabau nya siku ular ti mali diri nyadi mensia lalu berengkah nguntik bini siku bujang berani menua tu.

Meda baka nya, iya pen ngeransi lalu nangkap sereta mumpung ular Nabau nya ngagai tujuh iti lumpung lalu dibuai iya ngagai Wung Pelagus, Sungai Rajang.

Nya meh ti nempa tujuh iti wung ba sungai nya baka Wung Nabau, Wung Tilan, Wung Batu Naga, Wung Lapoh, Wung Batu Kawie, Wung Sukat enggau Wung Pantu.

Cherita ditampung ari mulut ke mulut mega madah, kelia bisi siku bujang berani kayau mai pala munsuh pengudah ngayau lalu iya digagai munsuh nyentuk ngagai Sungai Bukong.

Kelia Sungai Bukong nya chukup pemesai lalu bujang berani nya enda ulih nyemerai sungai nya lalu besampi ngagai Petara minta bantu.

Enda memukai, siku ular besai ti dikumbai Nabau pansut lalu ngerentangka tubuh diri ba sungai nya.

Bujang berani nya pen ngelayang Sungai Bukong niti tubuh ular nya tang pengudah iya datai ba seberai, iya pen mumpung pala ular nya ngambi munsuh enda ulih nitih iya ke seberai kia.

Nya meh sekeda misteri enggau cherita nyelai senentang Batu Nabau ti bepalan ba Kampung Bukong, Engkilili.

Dikena nambah ke penyelai Batu Nabau nya, dia deh sekeda peranak dia ngechat batu nya ngena churak kuning emas ngambi batu nya bisi likau baka ular Nabau.

Lebuh kitai ngusung palan nya, dia kitai deka meda batu nya endang amat baka gamal ular besai pengudah dichat.

Mensia mayuh ti deka nemu silik tauka deka meda ngena batang tubuh diri empu Batu Nabau nya diperansang sampal ngusung palan nya ba Kampung Bukong, Engkilili.