KUCHING: Opis Pengerara Api enggau Penyah Penusah Malaysia (JBPM) merambu deka numbuhka sebengkah Mountain Cave Search and Rescue (Mocsar) ba palan kritikal baka di Gua Mulu.
Direktor JBPM Sarawak PKPjB Khirudin Drahman @ Hussaini madahka iya besetuju deka numbuhka Mocsar ba palan dagang temuai ti kasar ti narit mensia mayuh kelebih agi temuai ari menua luar.
“Kami bisi perambu deka numbuhka tim Mocsar deka meda palan ti suah ditapatka temuai ti mega dikategori palan enda likun.
“Tuju Mocsar ditumbuh dikena nagang sebarang penusah ti enda disadang nyadi lalu tim tu ulih nyadi raban ngesah enggau meri penerang,” ku iya.
Khirudin madah munyi nya lebuh dirandau pemberita ba Pengawa Pentauliahan Pemesai Bomba Bantu (PBB) Stolport Lawas di Indu Opis JBPM Sarawak ditu tadi.
Nangkan nya ku iya, sida ti rindu bayam pemanah rampa menua asal nadai berundingka penusah ti tau nyadi sereta sanggup mansutka belanja besai semina ketegal deka bayam pemanah rampa menua baka di Mulu.
Iya madahka rindu agi program ti ngena chara nagang lalu tim Mocsar deka dilempai tanggungpengawa nagang barang sapa bagi nguji deka ngereja ulah ba luar kuasa sida.
“Enti sema tim Mocsar tu bisi, sida ulih nyadi malin bekaul enggau gaya hari lalu nagang aktiviti nya patut ditampung tauka enda.
“Diatu, bala temuai semina bepanggai ba malin temuai bejalaika aktiviti sida,” ku iya.
Taja pia ku Khirudin, pekara tu agi dalam perambu sida lalu deka diperundingka agi.
Ku iya, enti Perintah Sarawak deka bekerjasama enggau JBPM numbuhka Mocsar, latih ba pengawa nya deka ditampung.
“Tu nyengkaum latih pemun ngidupka seput baka ngena tali, mindahka orang ditinggang penusah enggau ke bukai.
“Kami mega udah bejalaika pansik di Mulu lalu beratika endur nya endang enda likun ,” ku iya nerang.
Khirudin mega madah sida deka bekerejasama enggau ketuai zon enggau opis bomba ngambi ulih beratika endur enda likun baka ai.
“Kami udah bekerejasama enggau Perintah Sarawak ngelekat papan tanda tangkan endur ti enda likun.
“Taja pia, agi bisi sekeda komuniti kita enda ngasika tangkan sereta meretika papan tanda nya,” ku iya.
