MPKK beambi ulih ke politik?

(…randau silik dikeluar Hari Minggu tu)

KUCHING: Pengawa numbuhka Kaunsil Pengatur Komuniti Genturung Pendiau (MPKK) diperati semina deka ngulihka kuasa aja taja Pakatan Harapan (PH) apin megai perintah.

Menteri Muda Kaunsil Kandang Menua enggau Pengawa Berumah Sarawak, Datuk Dr Penguang Manggil nyemetak madahka sida (PH) endang nadai tuju bukai kelimpah ari beambi ulih ke penguntung politik diri empu.

“Sida naka ulih ngayanka pementas enggau penyiru ngagai rayat kelebih agi ba rumah panjai di menua pesisir enggau menua ulu laban deka bejalaika agenda politik.

“Taja pia kitai bela udah nemu tuju sida tu endang chara alus dikena ngajum runding rayat ngambika pambar, enda sepenemu sereta charut enggau pangan diri.

“Kebuah pia ba penemu aku, beratika chara sida deka nyiri orang ti mangku pengawa ukai ari runding ketuai ti patut enggau udah dipilih, tang nengah parti,” ku Penguang.

Iya mansutka penemu nya lebuh dirandau Suara Sarawak lebuh ditanya pasal perambu Perintah PH majakka penemu numbuhka 5,900 MPKK ba menua tu, Hari Dua tu tadi.