SIBU: Serakup Dayak Iban Sarawak (SADIA) udah mantaika tiga peminta ngagai Menteri Besai Datuk Seri Anwar Ibrahim enggau tuju nyaga pengelantang komuniti Dayak.
Chairman Mendam SADIA, Munan Laja madah, keterubah nya pasal pengawa ngajar Jaku Iban di sekula.
Ba Sarawak ku iya, subjek Jaku Iban napi penanggul suntuk pengajar iya nya suntuk 2,100 pengajar ungkup sekula primary enggau 26 iku ba sekula sekondari.
“Berindik ari pengawa ngambi pengajar baru udah dibeku kenyau ari taun 2022 enggau 2023, aku minta Opis Menteri Pelajar Malaysia (KPM) mutar isu tu,” ku Munan ba jaku pengelalu Pengerami Mantar Gawai SADIA 2023, malam kemari.
Bisi 900 iku udah ngulu pengerami ti dipenyadi Sekretari Politik Menteri Besai, Chan Ming Kai ngarika Menteri Besai, Datuk Seri Anwar Ibrahim.
Ba pekara kedua, iya merambu unit khas pengerara api ditumbuh ba genap rumah panjai di Sarawak dikena nagang kes angus ti suah nyadi ba rumah panjai.
“Ari taun 2015 nyentuk 2020, bisi 121 buah rumah panjai angus. Nya kebuah, malam tu aku merambu ngagai perintah numbuhka unit khas ngerara penusah angus ba genap rumah panjai di Sarawak iya nya 5,000 rumah panjai ba menua tu,” terang iya.
