Muzium Baru Kuching dibuka ujung taun 2020

KUCHING: Muzium Baru Kuching deka diserah ngagai Opis Menteri Dagang Temuai, Seni, Main Asal, Nembiak enggau Lumba mingu siti tu ila.

Menteri Opis nya, Datuk Abdul Karim Rahman Hamzah madah begunan baru muzium udah tembu digaga.

“Tang muzium nya enda ulih dibuka ngagai mensia mayuh dulu dalam kandang setaun laban kereja ngatur penerang perengka dalam muzium nya ngambi awak ti lama.

“Muzium tu dipelaba dibuka ngaga mensia mayuh ujung taun 2020,” ku iya.

Abdul Karim madah pekara tu lebuh ditanya pemberita ba Pengerami Ngelalu Pengabang Hari Raya iya empu ba Palan Aum Penview di Demak, kemari.

KENANG HARI RAYA…Kepala Menteri Datuk Patinggi Abang Johari Tun Openg (dua kiba) enggau Datuk Abdul Karim Rahman Hamzah (kiba) begambar kenang enggau temuai ti bisi datai.

Nangkan nya, Abdul Karim madah sentang rega tikit masuk ngagai muzium baru tu ila deka diputuska ba kabinet nengeri.

“Ungkus ngaga muzium baru tu besai urung RM300 juta nya alai pemutus sentang rega tikit muzium tu deka diaum ba kabinet nengeri.

“Kitai mega deka ngiga chara ngenaka bayar tikit ti bebida ngagai peranak menua, nembiak sekula enggau temuai menua luar maya muka muzium tu ila,” ku iya.

Ba pekara bukai, iya madah Muzium Lama Kuching kediatu mega agi benung diseruri.

“Perabung muzium lama agi diseruri lalu dipelaba tembu taun siti tu ila.

“Pia mega perengka lama dalam muzium nya bisi dipindah maya nyeruri perabung, udah tembu diseruri ila kitai deka ngengkah perengka nya nuju palan iya empu baru,” ku iya.

Ngelansa mensia mayuh ti datai ngagai Pengerami Ngelalu Pengabang Hari Raya iya madah chukup gaga laban mensia pupu bansa urung tiga ngagai empat ribu datai ngabang sereta betabi jari enggau iya.

Sama bisi datai ba pengerami nya Kepala Menteri Datuk Patinggi Abang Johari Tun Openg, Menteri Muda Undang-undang, Kaul Sarawak enggau Perintah Besai sereta Matau Projek Sharifah Hasidah Sayeed Aman Ghazali, Menteri Muda Nembiak enggau Lumba Datuk Snowdan Lawan sereta mensia mayuh.

Suara Sarawak