Nama kebuah ‘Khat’ dipasuk ba subjek BM?

KUCHING: Gempung Sarawak Baru (SB) bela beratika timbal mensia mayuh sentang pengawa Opis Pelajar Malaysia (KPM) ti deka nambahka pelajar ‘khat’ (Tulis Jawi) ba subjek Bahasa Melayu (BM) Primari Empat.

Biro Komunikasyen SB madahka perambu KPM nya enda tentu engkeman dipejalai bepelasarka timbal ba media rama ti mayuh agi ningkah ari setuju.

“Ari timbal mensia mayuh dipeda sebelah media rama, KPM patut bejimat agi enti deka ngubah baru silibus pelajar menua tu.

“SB ukai deka mantah perambu nya tang deka nemu nama kebuah pelajar ‘khat’ diajar ba subjek BM.

“Nama kebuah KPM enggai begulaika pelajar ‘khat’ tu ba subjek Seni ti diperati engkeman agi,” ku iya nengah penerang berita ditu, kemari.

PBDS Baru

Penerang nya mega madahka KPM patut bejalaika pansik silik agi enti deka ngemanahka sistem pelajar menua tu, ti semampai diubah nitihka menteri ti baru dipadu gawa.

Ku iya, nembiak sekula patut agi diperansang belajar enggau angkunka subjek Sains enggau Teknologi laban subjek baka tu beguna amat ngagai sida besemekih enggau komuniti dunya.

“Ari penemu enggau perambu baka tu, kitai ulih meda enggau ngasaika polisi pelajar nasional enda teulihka pemujur, nangika puntan nyapai juluk.

“Enti polisi pelajar kitai amat mujur, nama kebuah mayuh bala menteri nganjung anak sida belajar ba sekula menua bukai?” ku iya nanya.

Ba lansa bukai, SB andal amat Perintah Sarawak ulih ngambi pulai kuasa otonomi pelajar menua tu.

“Kami deka meda rayat Sarawak kelebih agi rebak baru bisi peluang manah agi enti sema kuasa otonomi pelajar dipegai menua kitai empu.

“Pemisi kuasa otonomi ngasuh kitai ditu nadai napi penanggul ngangkatka pemanah tikas pelajar sebaka enggau menua ti udah nyulut ba pelajar baka menua Norway enggau Singapore,” ku iya madah nyemetak.

SB tu datai ari gempung Parti Bansa Dayak Sarawak Baru (PBDS Baru), Parti Reformasi Nengeri Sarawak (STAR) enggau Sarawak Workers Party (SWP).

STAR Sarawak

 

SWP