Nama reti tegulun ba jari Temenggong Koh?

BUNGAI pantang dikumbai tegulun semina ulih dipantang ba tunjuk jari orang ke kala bedengah aja.
Siku bujang berani Iban chukup beberita sereta ditemu mayuh dengah iya nya Temenggong Koh (1870-1956).

Temenggong Koh dipadu nyadi penghulu bansa Iban ari pelilih Kapit dipadah udah bedengah lebih ari 100 igi pala lebuhka nurun ngayau enggau beperang ngelaban soldadu penyelawai.

Nampung jerita sida ke tuai, ba belakang jari iya dipantang ngena bungai pantang ngelai bujang berani lalu semua bungai pantang nya dikumbai Tegulun.

Ari dekuan nyentuk tunjuk jari Temenggong Koh abis dipantang ngena bungai nya kelai iya udah bedengah.
Rambau jeman menua benung siga suba lebuh beperang ngelaban munsuh, bujang berani ke pulai mai pala munsuh deka digagaka Tegulun ba tunjuk jari iya.

Genap pala munsuh ke diulih, siti buku tegulun deka dipantang ba tunjuk jari lalu pia mega tiap kali iya bulih dengah baru.

BUJANG BERANI… Temenggong Koh

Enti sema pemayuh pala munsuh ke diulih nadai ulah dikira agi lalu semua tunjuk jari enggau dua tunjuk indu udah abis dipantang, Tegulun deka ditampung ba belakang jari.

Ku orang tuai, mayuh penti pemali enti sema siku-siku kitai deka ngaga pantang bungai Tegulun kelimpah enda tau enda udah tauka kala bedengah.

Nikalka pengingat, siku diplomat British, Malcolm MacDonald kala ngatur pejalai nemuai ngagai Temenggong Koh ba rumah panjai iya di ulu Batang Baleh.

Lebuh datai iya, Malcolm meda lebih ari selunsin rangkah pala ti disalai atas bedilang dataika chukup rangkai lalu pala nya dikelalin ngena wi, dalam tujuh ngagai sepuluh igi siti kelalin.

Temoggong Koh nyemetak madah, nadai siku keruntuk pala nya ari bansa Iban lalu munsuh ke dikayau sida endang ari raban bansa Kayan.

KELAI BEDENGAH… Kededua tunjuk jari Temenggong Koh abis dipantang engggau bungai pantang Tegulun.

Ku iya, keruntuk pala diulih sida ngayau nya nunjukka darah bujang berani lalu dikemegah sida sebilik, nyadika pemandang sereta pengeraja.

Kelimpah ari nya, iya mega bisi bulih dengah pala soldadu Jipun rambau Perang Dunya Kedua suba.
Siku antropologis News Zealand, Derek Freeman enggau bini iya, Monica nyadi bakih Temenggong Koh lebuh nungkap pasal bansa Iban ari taun 1948 nyentuk1950.

Monica ngena awak nya nero bungai pantang ari raban bansa Iban sereta bansa asal ke bukai ti ditemu sida.
Iya madah, jari kiba Temenggong Koh dipantang siku bansa Kejaman ti enda dikelala nama dalam taun 1925 enggau rega $5 Sarawak dollars.

MacDonald udah nya diambu Temenggong Koh lalu diberi sebilah nyabur ti kala dikena iya ngayau, nyadika pemeri enggau ke tanda udah ngambu MacDonald ke anak.

Nitihka penerang, nyentuk sehari tu nyabur nya meruan disimpan ba Durham University Oriental Museum, United Kongdom.

BISI RETI… Gaya bungai pantang Tegulun ba tunjuk indu jari kiba enggi Temenggong Koh.

Suara Sarawak