Napang idang singut chara Pakau

KAYU tapang semampai nyadika leka sempama sida ke tuai lebuh besemaka puchuk tapang enti mandingka peninggi.

Nampung penemu sida ke tuai ku Sang Sanjan, tapang tu sebansa kayu ti kering, bedaun mit lalu suah agi ditemu tumbuh semak sungai.

Kenu ku pengarap lama kitai bansa Iban, mayuh tapang diuan antu rembia lalu kayu tu deka bendar ditepan singut, endur manyi ngaga idang.

“Nya mih kebuah kitai Iban enggai enda nimang tapang dikena ngasuh antu nya lari sereta enda ngachau sida ti deka muar manyi.

“Pengawa muar manyi ari puchuk tapang tu sebagi ari daya idup kitai bansa ti dikumbai napang,” ku Sang, peranak Rumah Linggie Layang, Nanga Sikit, Ulu Kakus, Tatau Bintulu.

NIMPAI MENUA… Gambar kenang Sang lebuh bejalai gawa ngagai menua ulu.

Pengawa Napang

Kenang sekali tu ku Sang, nguji meratika enggau ngelansa pengawa napang tauka pengawa muar manyi ari puchuk tapang ti suah dikereja kitai bansa asal lalu agi dikemeran nyentuk sehari tu.

Nitih ku jerita tuai, sebedau muar manyi ari dan tauka puchuk tapang, dia orang deka beratika gamal idang manyi ti inggap ba tapang nya dikena nentuka pemisi isi iya.

“Sida bechuanka gaya langkar enggau pemesai idang dikena nentu sekalika iya udah tau dipuar tauka bedau.

“Enti idang manyi nya dipeda mipis, betangkal tauka bepala, nya nandaka iya udah tau dipuar,” ku Sang nerang.

NGETU BELELAK… Sang enggau bala bakih sama gawa ngetu ngintu diri di kaki bukit ti bisi panchur ai wong.

Kelimpah ari nya, orang enda tau enda ngintaika bulan ti ngena baka lebuh anak bulan enggau bulan kembung surut.

“Kereban ti deka disedia sebedau muar manyi baka sempun, rintung, senduk, beledi tauka tin.

“Sempun tu digaga ari kulit kayu lalu rintung diterinsung ari upih mulung, jengang ari mua lalu jumpit ke burit ngambika enda mudah tetukil ba dan kayu lebuh diulur,” tampung iya.

Chara Napang

Ngelansa pasal chara niki tapang, bansa kitai endang bisi ngemeran empat bengkah chara bepelasarka pendiau kayu tapang enggau dan singut ingap.

CHIRU… Penyelap enggau penyiru ai kerangan di Sungai Pila, Kapit.

Kesatu ngena jalai pakau, kedua ngena chara tali tekang, ketiga ngena jalai surung kait lalu keempat, chara kepenudi ngena chara tatuk.

“Chara ti dikenang kitai ditu iya nya ngena jalai pakau lalu enti dipakau, dia orang ngiga kayu siti ti panjai sereta ganggam.

Kayu tu lalu disembarka ba batang tapang nyadikaka tiang pakau ti digaga betampung-tampung lalu ditanchangka empalang alai berindik enggau bepegai,” ku Sang ngelansa silik.

Seraya penyarang empalang tu kira penumbas alai betunjan niki lalu ba sekeda menua, tiang pakau tu dikumbai tiang sengayan.

Pengudah tembu pakau, baru orang bejadika api enselua ngejang ari pun tapang dikena ngemegauka indu manyi ngambika enda ngachau orang ti muar enggau sida ti nganti di tanah.

PERISI… Gaya pendiau kayu tapang ti suah endur singut ingap sereta ngaga idang.

Udah api dipenyadi, nya baru orang belabuh niki niti pakau ngelawa dan tapang ti bisi idang singut.

Di puchuk tapang orang lalu nepas siti idang dikena ngabas. Udah nya baru orang belabuh nimang tapang ngena leka timang nitihka gaya perisi idang manyi.

Enti idang manyi nya bisi isi, dia orang lalu muji tapang nya lalu tembu ditimang, nya baru orang ti niki sama belabuh nepas. Sempun dibai sida dipangka-pangka ngagai dan tapang.

Indu manyi disiar ngena sempun ti berasap lalu ukai ngena daun api laban murun tauka perechi bara api ti labuh nya dititihka indu manyi, terebai jauh ari idang. Udah nya baru sida nyubak idang ngena senduk ti dikumbai belidau.

Kepenudi iya baru orang ngulihka pala ti ngundan madu manyi. Idang enggau madu lalu disimpan dalam rintung sereta diulur ke baruh ngagai sida ti nyambut rintung nya lalu magi idang ari manyi.

PAKAU… Kayu disembarka ba batang tapang nyadikaka tiang pakau ti digaga betampung-tampung lalu ditanchangka empalang alai berindik enggau bepegai.

Penti Napang

Nyadi sekumbang orang ti muar manyi tu dia sida ti nganti ba tanah megai sekeda penti.

Ambika banding, sida enda tau nunu anak manyi, ikan, belachan enggau semua utai ti bebau rum.

Kebuah penti tu baka nya ku ajar sida ke tuai laban antu rembia enggai ensium utai bau nya.

Kelimpah ari nya, manyi deka mangah sereta tau malut orang enti sida udah ensium bau rum utai ti ditunu lalu tau ngujungka iya ngachau sida ke niki.

“Tu mih sebagi ari jalai kitai Iban ngereja pengawa ti dikumbai napang baka ti diajar sereta ditampung ari sida ke tuai suba,” ku Sang nyimpul randau enggau Suara Sarawak.

CHECHEGIT DI LANGIT… Kayu tapang