SARIKEI: Program Tibang Pemakai Malaysia sebengkah inisiatif siruka rayat Opis Menteri Dagang Dalam Menua enggau Kos Pengidup (KPDN) dikena mantu raban ti kurang penatai pemisi ngulih pemakai kelimpah ngelempung tating pengidup sida.
Direktor KPDN Sarawak, Matthew Dominic Barin madah, KPDN sebengkah ejensi pemungkal ti bejalaika program nya sereta nyadi pengatur entara pemeri bantu enggau bakih strategik ti mantu bejalaika program nya.
Ku iya, program nya dikerembai ngagai renggat palan pelajar tinggi perintah nengah Program Tibang Pemakai Graduet.
Iya madah, nya dikena mantu raban graduet ti datai ari ruang bilik B40 ngambi sida ulih ngemerat pekara pelajar diri enggau ngasi agi.
“Program Tibang Pemakai Graduet tu dilanchar kena 3 Mei 2019 ba Universiti Malaysia Sarawak (UNIMAS) enggau 2 November 2022 ba UiTM Kampus Samarahan.
“Ungkup Bagi Menua Sarikei, program sebaka dipejalai ba Palan Pematih Pengajar Kampus Rajang,” ku iya.
Matthew mansutka jaku nya ngagai pemberita pengudah bejadi bantu ngagai bala penerima, ditu tadi.
Iya madah, dikena negapka agi program nya, KPDN ngerembai enggau meransang bantu ari raban korporat, bala pemekuh industri sektor orang tengah, renchit, katering sereta orang kediri nyadi bakih strategik.






