SARIKEI: Inisiatif ngias palan mensia mayuh enggau elemen pengerami nengah Program Ngias Taun Baru China 2026 ba Taman Layang-Layang Sarikei dipeda ulih nyadi pelasar nemban negap penyerakup nasional sereta nyaga pengelantang komuniti pupu bansa.
Sapit Menteri Pengawa Bekebun Bedandang Besai enggau Komoditi, Datuk Seri Huang Tiong Sii madah, program baka nya ukai semina ngerichah pengerami aja tang mega ulih narak semangat begulai enggau bela bebasa ke pangan diri.
“Pengerami Taun Baru China mandang singkang baru enggau pengadang nuju pengidup ti menyana enggau lantang agi.
“Pengawa ngatur program tu mega mandang bemacham budaya ti nyadi peneguh menua,” ku iya lebuh bejadi program, kena Hari Enam.
Ku iya, pengawa ngias palan mensia mayuh enggau elemen budaya sereta pengerami patut ditampung laban nya meri awak interaksyen sosial entara raban bansa lalu nyaga pengelantang sosial ba renggat komuniti.
Iya ti mega Kaban Parlimen Sarikei enggau Kaban Kunsil Nengeri (ADUN) Repok madah, inisiatif nya mega ngemanah nama Sarikei nyadi palan dagang temuai menua.
Nya nyengkaum bisi pengulih ngeranchak aktiviti ekonomi lokal nengah penatai pemisi majak nambah.
Program nya mujur matak urung 100 pengusung ti mandangka mayuh pengias ngena konsep asal enggau moden baka tanglung merah, pengias kreatif ngelantang komuniti sereta replika zodiak Taun Kuda.
Program Pengias Taun Baru China 2026 nya mandangka pengawa betampung raban bekaul narak semangat beserakup enggau pengelantang nipak juluk menua diuan pupu bansa.
— EDISI UKAS
