KUALA LUMPUR: Pemansang penau raban anak Sarawak beguna amat ba transformasyen ekonomi nengeri tu.
Premier Sarawak, Datuk Patinggi Tan Sri Abang Johari Tun Openg madah, anak Sarawak ulih nyulut ba bemacham pengawa enti sida disikap ngena latih ti menyana.
Ambi ke chunto, ku iya, penyulut siku nembiak Sarawak ba Universiti Oxford, Syed Nizamuddin Khassim ti nerima anugerah ba Program Pelajar Diplomatik empai lama.
“Kitai ulih meda anak Sarawak enti disikap ngena latih menyana, sida deka nyadi anak tebilang ba semua pengawa.
“Mayuh agi anak kitai udah nyulut, nya alai, pemansang penau beguna amat dikena mantu kitai ngubah ekonomi kitai,” ku iya.
Abang Johari mansutka jaku nya rambau Pengerami Makai Lemai Lan Berambeh Anak Sarawak (LBAS) 2023 ba MITEC ditu, malam ensanus.
Nya alai, iya ngemerat pemesai guna Strategi Pemansang Pengudah COVID-19 2030 (PCDS 2030) ba pemansang nengeri tu.
Ku iya, PCDS 2030 bepelasar ke tiga pugu besai baka pengelantang ekonomi, bungkur sosial enggau pemeruan rampa menua dilangkar berebak ari ubah dunya kemaya hari.
“Tu polisi baru berebak ari gaya dunya ti udah bebali enggau gaya pekara ti nyadi ba rantau tu.
“Kitai ulih ngena penegap dikembuan Sarawak nengah bemacham pemansut ti diberi Tuhan ngagai kitai lalu nya patut diatur enggau manah,” ku iya.
