Nembiak pom dua bebadi nyawa, motosikal ngelantak pun kayu

SIBU: Siku nembiak pom dua bebadi nyawa pengudah motosikal ke ditepan iya tepawah lalu ensayar ngagai tisi jalai sebedau ke ngelantak pun kayu.

Penusah nyadi dipelaba urung pukul 4.50 lemai ba Jalai Salim/Stabau ditu, kemari.

Ketuai Polis Pelilih Sibu ACP Stanley Jonathan Ringgit madah, nembiak ke bebadi nya beumur 14 taun ari Rh Nagak, Sungai Salim dikelala enggau nama Desmond Dan.

“Penusah enda disadang nyadi maya nembiak nya ba rantau jalai datai ari Salim/Stabau nuju ke sebuah palan bebeli barang ke besemak,” ku iya nengah sebengkah penerang, kemari.

Stanley madah, nembiak nya madamka seput ba palan penusah nyadi ketegal balat bakal ba pala.

Ku iya, nembiak nya deriba nadai lisin kelimpah nadai ngena topi kelidar maya penusah nyadi lalu kes benung dipansik.

PALAN PENUSAH…Pun kayu tu mih ke dilantak nembiak nya.

Suara Sarawak