Ngambi pulai keresa Koperal David

KUCHING: Empat iku sebilik enggau Koperal David Edmund Rapi kemari berangkat terebai ngagai Alor Setar mai pulai keresa Koperal David.

Sida betubuh empat tu iya nya apai Koperal David, Edmund Rapi, indai David, Teresa Hamline, madi tuai iya, Morni Edmund Rapi enggau madi biak iya, Nur Lina Aisyah.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka Perintah Sarawak mantu semua belanja pejalai sida sebilik ke Alor Setar nya.

“Sida angkat ari Kuching ngena penerebai bilun pukul 10.15 pagi tadi lalu nampung penerebai sida ari Kuala Lumpur urung pukul 2.30 lemai napatka menua Alor Setar sebedau ngelawa kem soldadu.

“Semua pekara bekaul enggau pejalai sida sebilik di Semenanjung diatur Unit Pengelikun enggau Penerit Adat Nengeri (UKPM),” ku iya.

TERIMA KASIH… Morni meri terima kasih ngagai Perintah Sarawak enggau semua rayat ti enda putus meri sukung enggau tulung ngagai sida sebilik kelebih agi lebuh dituntung penusah lenyau madi, Koperal David Edmund Rapi.

Fatimah madah munyi nya rambau aum pemberita di Bilik Media, Terminal VVIP Padang Bilun Antarabansa Kuching (KIA) ditu tadi.

Ku iya, penerebai sida Edmund Rapi sebilik mega diketuai Pemesai Pengelikun ari UKPM Sarawak, Zayadi Sebeli.

“Tuju pejalai sida tu kin ukai semina deka ngambi keresa Koperal David aja tang mega deka nemu penerang silik enggau pekara ke bendar nyadi ngagai iya sereta Lans Koperal Moses.

“Ngarapka semua pejalai ba Alor Setar ulih muntang sereta mujur kelebih agi ba pengawa ngiga seduai ti lenyau nya,” ku iya.

Berebak enggau nya, menyadi tuai Koperal David, Morni Edmund Rapi madahka sida beterima kasih ngagai Perintah Sarawak laban udah gerah jari mantu pejalai sida ngagai Alor Setar.

“Kami udah ngena mayuh chara, ari ngena chara diri empu dataika sida minta saup ari Perintah Sarawak.

“Nya alai kami ngarapka nengah pejalai kami baka sehari tu tau bulih penerang ti betul sereta pemadu baru pasal penusah madi kami nya,” ku iya.

Ku Morni, sida semina deka nemu pekara ti nyadi lalu nama bagi bantu nyengkaum naka ni pengawa ngiga enggau nyelamat (SAR) ti udah dipejalai naka diatu.

Sehari tu udah manggai hari ke-26 Koperal David enggau Lans Koperal Moses Logers lenyau di Pulai Perak, Kedah.

Naka diatu, SAR udah diketu dulu lalu nadai penerang pemadu baru bekaul enggau pengelenyau seduai nya.

Suara Sarawak