KUCHING: Pekara pemeruan patut diberi perati ba Projek Begunan Arkib Sarawak enggau ngena elemen gadung ba gaya langkar enggau kandang ngelingi nya. Premier Sarawak, Datuk Patinggi Tan Sri Abang Johari Tun Openg madah, entara chara ti ulih dikena nyengkaum sistem nadu ujan enggau gaya langkar rampa ti mantu nyimpan ai.
Ku iya, nya mega deka ngurangka pengangat gaya hari nipakka juluk Perintah Sarawak ba pemansang menua. “Ubah gaya langkar ti nyadi maya pandemik COVID-19 ngujungka sekeda elemen asal nyau disetipak enggau utai diguna lebuh nya.
“Kitai ulih nipak kompaun enggau sistem tadu ai ujan ti ulih nyimpan enggau nyelapka pengangat, ngena chara meruan ti bisi,” ku iya. Abang Johari nyebut pekara nya ngagai pemberita pengudah ngabas taba projek sepiak Pustaka Negeri Sarawak, ditu ensanus.
Tuju pejalai gawa nya ngabas gaya pejalai projek enggau mendingka penerang teknikal ari Opis Kereja Raya (JKR) Sarawak begulai enggau perunding sereta kunteriktor projek.
Iya mega diberi penerang pasal semua atur taha projek, gaya teknologi tu dikena, pemar ditapi enggau saup ejensi sereta orang megai saham ti bisi kaul ba projek nya.
Projek Begunan Arkib Sarawak didiri ba taba pemesai 17.6 ikar sepiak Pustaka Negeri Sarawak enggau pemesai geladak kasar 25,476 meter persegi disadang tembu Julai 2026.
Projek nya dilangkar nyadi siti fasiliti moden dua setengah ringkat ti deka nyadi palan naruh dokumen enggau rikod beguna perintah nengeri, nyengkaum kereban arkib ti meseti dijaga terit ari sukut pengangat enggau tikas embap endur nya.
Entara penyelai projek tu baka ngena sistem Automated Storage and Retrieval System (ASRS) pemesai 10,000 meter persegi — sistem automatik ti ulih endur naruh enggau ngambi kereban arkib diatur efisyen enggau likun agi
. Teknologi ASRS dikeandal ulih ngurangka dokumen retai, nyamai digiga enggau ngelimat endur betaruhka kereban kelimpah nambahka penyikar ngadu kereja chara automatik. Projek begunan nya mandangka Perintah Sarawak terus ransing negapka pengawa ngintu penerang enggau pesaka dokumentasyen nengeri ngena chara taruh moden ti bisi integriti tinggi. ASYRAF HALIM
