ARI kebelik manik, perenching pirak enggau pengalus tenun Pua Kumbu, bisi siti jerana bekaul pemereti ati, falsafah pengidup enggau sejarah komuniti Iban.

Ngepan Iban ukai semina pekayan asal ti dirasuk maya Gawai Dayak, pengerami main asal tauka pekit kumang.

Tang, tiap lambar kain, tiap burai manik, kalai, tengak enggau pengias ba pala bisi nama, guna sereta reti ti mandangka status rama, pemerani, pemintar, pengalus seni enggau identiti sesebengkah komuniti.

Nya kebuah, pengawa nyaga Ngepan Iban enda ulih semina meri perati ngagai sukut pekayan aja, tang meseti disempulang enggau pengawa nguasa penemu ngambi pesaka budaya ti ditampung aki ini kitai tu terus meruan tulin enggau enda lenyau disegang arus pemansang moden.

Pekara nya nyemetak dipadah Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan lalu ngelalau rebak biak nambah penemu bekaul Ngepan Iban. 

Ku iya, agi tubah orang ti ulih ngerasuk Ngepan tang enda ngelala nama sereta guna keresa nya lebuh ditanya bala akim maya bepekit.

Pekara tu mandangka pemanah Ngepan aja enda chukup tang pesaka asal kebendar semina ulih dijaga lebuh komuniti nemu reti tetiap keresa ti dirasuk nya.

Ambi ke chunto, Ngepan Iban ukai semina ngerasuk kain tenun aja tang disikap bemacham aksesori baka marik empang, lampit, sementing ringgit, tumpa, kalai, sugu tinggi enggau ke bukai ti bisi reti sereta lambang.

Sama mega enggau pekayan dikena lelaki tauka Keling ti ngena sirat, gagung, marik, terabai, ilang enggau lelanjang ti mandangka pemerani sereta bujang berani.

Nya kebuah, tetiap keresa nya mandangka status, adat sereta identiti.

Tambah mega, penemu bekaul Ngepan nya bisi reti enggauseni kraf asal Sarawak.

Ambi ke chunto, kain Pua Kumbu dikena indu Iban nya ukai semina kain tenun aja tang tetiap motif enggau chura ti ditenun nya bisi cherita kediri empu.

Motif baka Engkeramba, Rang Jugah, Pau Jangak enggau ke bukai mandangka kaul mensia enggau rampa menua, pengarap komuniti sereta reti pengidup ti ditampung kenyau ari beratus taun ti udah.

Sama mega enggau seni nusuk leka marik, beranyam enggau ke bukai ti nyadi sebagi ari identiti Ngepan Iban. 

Lebuh rebak biak mereti ke penatai asal tetiap keresa tu, sida mega ukai semina ngerasuk pekayan asal tang mega ngenang pesaka budaya komuniti Iban.

Pengeleda bekaul pemesai guna nambah budaya mega dikerembai ngagai etnik bukai.

Tetiap etnik di Sarawak ngembuan pekayan asal ti nyelai digembar enggau sejarah sereta falsafah sida empu.

Dikena nambah penemu bekaul budaya, Perintah Sarawak nengah Opis Menteri Dagang Temuai, Industri Kreatif enggau Seni Pemerindang (MTCP) udah bejalaika mayuh inisiatif nentuka pesaka budaya majak ngerembai nipak pemansang nengeri.

Entara inisiatif besai iya nya ngatur festival main asal baka Pengerami Muzik Kampung Ujan Tropika (RWMF), Rainforest Youth Summit, Festival Gawai Dayak, Festival Main Asal Borneo sereta ke bukai ti ngempuru pemekuh budaya ari mayuh etnik.

Program nya ukai semina ngelaku budaya Sarawak ngagai temuai, tang mega meri peluang ngagai rebak biak belajar ke seni pemerindang, muzik asal, pekayan etnik enggau adat asal.

Perintah Sarawak mega ngagihka belanja dikena nyukung gerempung main asal enggau komuniti ti ransing nyaga pesaka nengeri.

Bantu belanja nya nentuka mayuh program baka woksyop tenun Pua Kumbu, latih nusuk leka manik, woksyop ngaga kain buri, kus ngaga ngepan, dokumentasyen budaya sereta ngatur pekit di selampur Sarawak.

Sukung perintah nya beguna amat laban mayuh penemu asal ulih ditampung ari orang tuai ngagai rebak biak.

Nambah ke nya, pengawa numbuhka Muzium Budaya Borneo di Kuching mega nyadi siti inisiatif beguna dikena nyaga enggau dokumentasyen pesaka asal bemacham etnik di Sarawak.

Muzium nya mandangka koleksyen pekayan asal, tekstil, marik, senyata, kereban muzik enggau keresa budaya ti digembar enggau penerang bekaul sejarah sereta guna tetiap komponen nya.

Muzium nya mega nyadi palan pelajar budaya nentuka nembiak, pemansik enggau mensia mayuh mereti ke identiti etnik Sarawak enggau lenak agi.

Perintah Sarawak mega chakah nyungkak industri kreatif bepelasarka pesaka asal nengah strategi ekonomi kreatif nengeri.

Pedagang tekstil asal, tukang tenun Pua Kumbu, pedagang kraf manik, tukang ukir kayu enggau artisan diberi peluang ngelaku produk sida nengah pemandang, festival, pelasar digital enggau program dagang temuai budaya.

Inisiatif nya ukai semina nyaga pesaka asal, tang mega nentuka budaya nyadi pemansut ekonomi ti ulih nambah penatai pemisi komuniti menua pesisir.

Ba konteks pekit main asal, Pekit Keling enggau Kumang Raban Ngepan Iban (RNI) entara chunto pemadu manah baka ni pesaka budaya dijaga nengah inisiatif pelajar.

Presiden Serakup RNI, Steven Abas Patrick Agus madah ke pekit tu ukai semina milih ikon pekayan asal, tang mega nyadi pelasar nambah penemu penyereta bekaul adat, budaya enggau sejarah Ngepan Iban. 

Kenyau ari dipejalai ba taun 2016, RNI udah ngatur bemacham woksyop adat, kelas ngelala ngepan sereta bekunsi penerang tokoh budaya enggau pakar pesaka sebedau pekit diatur.

Inisiatif nya nentuka penyereta mereti ke reti tetiap keresa ti dikena lalu ukai semina ngingatka chara ngena nya.

Pemujur RNI pengelama 10 taun mandangka pekit main asal ulih nyadi pelasar pelajar ti nemban.

Penerang RNI deka ngena konsep baru belabuh taun baru mega mandangka pengeran pengatur neleba program enggau pengerindu rebak biak lalu meruan nyagu pesaka asal ba pekit nya.

Nya alai, nengah sukung Perintah Sarawak ngena bemacham polisi, program enggau inisiatif main asal, Ngepan Iban ukai semina deka majak nyadi lambang dikemegah komuniti Iban tang mega mengkang nyadi siti ari pesaka budaya pemadu berega ba Tanah Kenyalang ti ulih nyantil sejarah lama enggau pemansang diatu sereta dudi hari.