KUCHING: Kongres Serakup Orang Gawa Perintah (Cuepacs) ningkah pengawa Nginsil Bayar Insentif Servis Kritikal (BIPK) ngagai orang gawa perintah ti deka diambi gawa berengkah ari 1 Januari 2020.
Presiden Cuepacs Sarawak Ahmad Mahlie madah, sida setuju sereta nyukung tegut penetap penemu Presiden Cuepacs Perintah Besai Adnan Mat ba pekara nya.
Ku iya, pengawa nginsil insentif nya siti chara ti udah enda engkeman dipejalaika perintah kelebih agi kitai keran deka nempa menua maju diatu.
“Nginsil BIPK tu semina deka meri empas enda manah ngagai servis kritikal kitai baka ngagai bala lutur, indu misi, pemesai perubat ngeli, pemesai farmasi, pemesai nyaga trafik langit enggau raban gawa bekaul ke bukai.
“Kitai nangika pengawa tu deka ngasuh rebak dudi mantul ati laban nadai sebarang insentif nyadika peransang sida minta diri gawa ba servis tu kelimpah ngasaika diri dichiping ari gaji,” terang iya.
Utai baka tu mega ku Ahmad deka ngasuh rebak biak ngiga peluang kereja ba menua luar ti nyendiaka gaji enggau insentif manah agi ti ulih nyamin pengidup sida.
