TOKYO: Sarawak terus ransing negap sektor berikan enggau akuakultur nengeri nunda model pansik Jipun. Menteri Industri Pemakai, Komoditi enggau Pemansang Kandang Menua (M-FICORD) Sarawak, Datuk Seri Dr. Stephen Rundi Utom madah, model ti bepuguka sains dipejalai Ejensi Pansik enggau Pelajar Berikan Jipun (FRA) ngait ati.
Ku iya, Jipun nyadi chunto pemadu manah ba pengawa ngemansangka sistem pansik berikan ti tegap, puh sereta setipak enggau polisi perintah, industri sereta akademik.
“Kitai deka meratika baka ni Jipun mujur nempa pengulih pansik sereta ulih ngentapka pengawa akademik, industri enggau polisi perintah
. “Peneleba tu endang engkeman dikena Sarawak negap ekosistem pansik enggau latih ba sektor akuakultur enggau marin,” ku iya.
Rundi madah munyi nya ba penemuai gawa ngagai FRA di Tokyo, disempulang Sapit Menteri M-FICORD, Datuk Martin Ben sereta Direktor Opis Betanam Betupi Sarawak, Dominic Chunggat.
Diligit Sarawak mega diberi penerang bekaul model Ngatur Pengawa Berikan Bepelasarka Sains ti begunaka data satelit, model dinamik tasik sereta kerejasama enggau raban orang berikan dikena melaba ubah ekosistem enggau gaya ngulihka ikan.
Iya madah baru, Sarawak bisi ati nunda chara Jipun ngatur bansa ikan invasif ti ngeruga biodiversiti menua, nyengkaum bekaul ikan Amazon ke tama ngagai sungai Sarawak lalu ngeruga bansa ikan asal.
“Pejalai nemuai tu meri peluang ngagai Sarawak nanggam kerejasama pansik sereta latih timpuh pandak ari baruh Japan International Cooperation Agency (JICA) ungkup pegawai engga pemansik menua,” terang iya.
Kelimpah ari nya, diligit mega diberi penerang bekaul National Fisheries University ari baruh FRA ke ngembuan tanggungpengawa matih nembiak sereta profesional ba bidang sains marin, proses produk ari pemakai tasik enggau injiniring akuakultur. – EDISI UKAS
