Nutup belanja JKKK, pemutus salah

“Taja JKKK tu ari perintah nengeri tang pengawa ngemujur JKKK tu patut disaup perintah besai laban genturung pendiau ngembuan JKKK pemadu mayuh iya nya urung 6,000 iti.”

KUCHING: Pemutus Perintah Besai nutup agih belanja ungkup Komiti Pemansang enggau Pengelikun Genturung Pendiau (JKKK) siti pemutus ti salah.

Menteri Dagang Temuai, Seni, Main Asal ti mega Menteri Nembiak enggau Lumba (Asajaya-GPS) Datuk Abdul Karim Rahman Hamzah madahka agih belanja JKKK sebedau tu sebagi ari saup entara perintah besai enggau perintah nengeri.

“Nyekat agih belanja JKKK ngagai kampung enggau rumah panjai siti pemutus ti salah.

“Taja JKKK tu ari perintah nengeri tang pengawa ngemujur JKKK tu patut disaup perintah besai laban genturung pendiau ngembuan JKKK pemadu mayuh iya nya urung 6,000 iti,” ku iya.

Info Grafik

Abdul Karim bejaku munyi nya lebuh bejaku ba aum pemberita maya Aum Kedua Renggat Keempat Dun Ke-18 ditu, kemari.

Ku iya, pemutus narit agih belanja tu mantaika perintah besai nadai ati bebendar deka mantu rayat.

“Baka ni enti kitai nibuh mayar 95 peratus minyak enggau gis ngagai perintah besai?

“Sida patut besaup mantu perintah nengeri enti sida amai deka mantu rayat,” ku iya.

Tandu iya, penumbuh Komiti Pengatur Genturung Pendiau Perintah Besai (MPKKP) nyangka deka ngelumpuhka kuasa perintah nengeri kediatu.

“Kitai di Sarawak digaga baka rayat Malaysia kelas kedua laban pengawa sida nguruska perintah baka nadai bejalai enggau manah.

“Nyangka mega sida deka mechah belahka menua laban sida nemu sukung besai perintah Gempung Parti Sarawak (GPS) ari rayat menua pesisir.

“Sida ngena strategi tu ngachau rayat ti ‘naif’ba menua pesisir lalu empas nya dudi ari ila pulai ngagai kami (GPS),” ku iya.

Suara Sarawak