SEBEDAU tu aku bisi bekunsi enggau bala pemacha pasal penemuai aku ke Rumah Bentang di wilayah Bengkayang, Indonesia.

Pulai ari Bengkayang, aku nuju Singkawang sebuah kandang menua ti majak maju sereta dilawa mayuh temuai ari menua luar kelebih agi kitai Sarawak.

Penemuai aku ba Singkawang deka dilengka ke aku dulu laban aku deka nyerungkai siti ari sejarah lama ba siti pelilih enda jauh ari Singkawang.

Lebuh pulai ari Singkawang, aku dibai singgah ba siti istana disebut Kesultanan Sambas ti dipelaba aku urung sejam lebih pejalai aja.

Kami bisi mansa siti pintu penama betulis Kesultanan Sambas, lalu ba mua penama nya mayuh pendam ti dibalut ngena kain bechura kuning.

Ku bala ti suah kia, pendam tu pendam sultan, ratu enggau kaban belayan Sultan Sambas.

Maya kami deka tama ke dalam istana besai, pintu istana nya tutup lalu kami sebuat ngaga pemutus semina ngambi gambar aja ba mua pintu penama nya.

Tang, enda lama udah nya bisi siku apai tuai muka pintu istana, ngujungka kami sebuat ulih tama.

Maya tama, aku meda istana nya baka palan nya baka muzium lama ti ngembuan mayuh gambar sereta cheremin ba genap empat penjuru rumah.

Ari nya aku nemu, apai tuai ti muka pintu istana nya tadi uchu Sultan Muhammad Ibrahim Shafiuddin.

Pendiau iya nyau tuai, buk udah burak tang iya kemerah bejaku sereta enda amu bebagi penemu nyerita pasal sejarah Kesultanan Sambas ngagai aku.

Ketegal awak ti chukup serekat, aku semina ngembuan awak 15 minit aja berandau enggau iya, ba penemu aku, awak tu chukup enda lama laban agi mayuh cherita sereta sejarah Sultan Sambas bedau diserungkai.

Nyadi, randau aku enggau iya tu semina ngelansa aja, lalu aku minta ampun nyema sekeda sejarah pasal Kesultanan Sambas tu bisi besibil ari sejarah asal laban apai tuai ti dirandau aku tu udah manggai umur 75 taun. Iya empu madah mayuh sejarah lama udah enda ulih dikeingatka iya agi.

Apai tuai nya tadi madahka nama iya Raden Herman Jaya Jingkap Rongga, 75, anak lumur tiga ari empat iku diri menyadi lalu iya ada ba taun 1950.

“Aku ada ditu, besai ditu, lalu insyaAllah aku deka madamka seput ditu mega,” ku iya ngepunka randau.

Raden berengkah nusi ngagai aku sejarah Kesultanan Sambas ti ngembuan kaul darah enggau Kesultanan Brunei.

Ku iya , aki ini iya datai ari peturun Sultan Tengah, siku orang kaya ari menua Brunei.

Dalam taun 1648, Sultan Sambas datai ke Ketapang lalu jadi enggau anak indu Raja Norman.

Belabuh ari nya, iya lalu numbuhka dinasti ti ngembuan budaya, adat enggau perintah Islam ba kandang menua nya.

PURIH PANTIS

“Sultan Sambas keterubah datai ari peturun Sultan Tengah, lalu peturun iya ngerembai ngagai mayuh bengkah kandang menua nyengkaum di Kuching, Santubong enggau Johor,” ku iya.

“Bisi sekeda ari peturun iya tu midang lalu dipendamka ba Santubong, Sarawak ti dikumbai orang ba Batu Buaya,” ku iya.

Iya madah, Sultan Muhammad Mulia Ibrahim Shafiuddin dipadu nyadi Sultan Sambas kena 15 Julai 1933 lalu iya megai perintah sepengelama sepuluh taun nyentuk perintah nya labuh ngagai soldadu Jipun dalam taun 1943.

“Ba timpuh ti pandak , iya ninggalka sekeda pesaka nyengkaum dua jematan ti digaga urung taun 1937, tang udah nya semua utai berubah,” ku iya.

Ku iya, pengudah dipegai Jepun, sistem perintah diraja enda agi diteruska enggau rasmi, taja pia, sida sebilik agi bejalaika pengawa nyadi Raja Komuniti iya nya tuai tradisional ti dipebasa ba dia.

Diatu, Raden diau enggau bini sereta anak iya semak Istana Sambas ti nyadi palan pesaka sejarah ti suah dilawa bala temuai baka ari Pontianak, Kuching, enggau Singapore.

“Kami muka istana tu nitih ke jam kami, kekadang pukul 9 tauka 10 pagi.

“Tang ukai tetap, laban kami nadai nerima gaji, kami semina nerima pemeri, bayar ari orang ti deka nemu sejarah,” ku iya.

TIPAN SEJARAH

Raden mega bisi nyerita ngagai aku sejarah penyarut bedarah Sambas enggau Madura dalam taun 1999.

“Aku nyadi tuai maya nya, nya kebuah Tiang Pengingat Sanggau Ledo digaga, nyadi kelai trajedi bedarah ti nyadi,” ku iya.

Ku Raden, bansa Sambas enggau Madura udah beperang 11 kali lalu sida enda kala bebaik.

Taja semua nya semina tinggal sejarah aja, Raden agi ngarapka rebak baru deka beterima kasih ngagai legasi ti ditinggal ke peturun sida.

“Aku udah tuai, perintah patut nyukung legasi tu, kami ti nyaga istana tu nadai nerima elaun ari perintah tang sejarah tu meseti ditan,” ku iya.

Ku iya, temuai suah datai kia nanya pasal sejarah, begambar tauka meri duit kelai terima kasih.

Taja mayuh nyimpan sejarah lama enggau ubah jeman, Raden mengkang taluk ngagai pangku pengawa ti dipegai iya.

Iya meruan, nyadi penyaga sejarah, waris kepenudi sereta nyadi pengemata pejalai panjai pesaka Kesultanan Sambas.

Tembu berandau enggau iya, aku dibai tama ngagai bilik peninduk Sultan Sambas.

Bilik nya enda entu besai tang dibalut ngena kain kuning ba semua sukut bilik kelimpah bau kemenyan.

PASU TEMAGA

Ba mua katil bisi siti pasu temaga ti ditabur berau kuning, Raden madah ngagai kami tau meri pemeri duit ba dalam pasu temaga nya sereta besampi lalu madah ke peminta ngagai Sultan ti ngempu bilik nya suba.

Pengudah aku nepu duit di dalam pasu temaga nya, Raden bejaku ngagai aku ‘neng, moyang saya sedang melihat kamu, dia ada dihadapan kamu, minta doa dengannya’ ku iya.

Aku tekenyit sereta enda nyangka iya tau nyebut munyi nya, bisi tiga kali aku malik ke mua pintu deka lari keluar tang kaki aku asai dikunchi lalu baka ti udah lekat ba papan.

Aku begaut ngerendut telefon ke dada aku empu, laban maya nya atau aku udah kekedap takut, semina pala aku aja ti asai ulih begilik kiba kanan.

Semua orang ti meda aku dia, diau magang lalu sida semina meda ulah aku enda bemunyi.

Raden udah nya lalu bejaku baru ‘moyang saya ada didepan neng, minta doa, dia melihat neng sekarang’ ku iya baru.

Seraya takut aku lalu mejamka mata besampi, enda lama aku lalu muka mata laban aku udah takut.

Aku lalu begaut keluar ari bilik nya mai bala bukai pulai angkat ari palan nya, Raden madahka iya deka mai aku meda pendam Sultan Sambas tang aku ngaga dalih kami begaut deka pulai ke Sarawak.

Enti ditanya aku pechaya ke enda pasal pekara ti nyadi di dalam bilik peninduk Sultan Sambas nya, aku empu enda iga berati ke pekara nya laban aku ngembuan pengarap bukai ari sida.

Tang aku mega meseti bebasaka pengarap enggau pechaya sida ti ngempu palan nya, engka iya amat bisi meda Sultan Sambas maya nya lalu nguji deka meri aku peluang ngaga peminta.

Engka mega iya deka ngambi ati aku laban aku orang ti mayuh betanya pasal sejarah Sultan Sambas maya nya.

Mayuh peragam ati aku pengudah pulai ari istana nya, tang aku ulih nyimpulka randau kami duai ti enda lama nya meri empas ngagai buah runding sereta peneleba mistik ngagai aku empu.

Bisi mega orang madah ke aku, nyema sampi ti dipinta aku ba dalam bilik peninduk Sultan Sambas nya nyadi nyata aku meseti datai kia baru meri terima kasih.

Aku pulai enggau penuh tanda tanya, runding aku maya nya puang sereta enda entu ulih berunding, tang aku mega gaga ulih meda enggau mata aku empu sejarah sereta pesaka ti ditinggalka Sultan Sambas.