Oba’ – pesan pengerindu ÁT ADAU nuju dunya

KUCHING: Lemai 2 Febuari tu tadi album kedua, diberi nama Oba’ mujur dilanchar ba sebengkah pengerami diatur ba Rumah Asap Tabuan Dayak ditu.

Oba’ ngemai reti pengerindu datai ari jaku bansa Dayak-Kenyah, iya nya Kenyah Bading di Pelilih Belaga, adap Selatan Sarawak, ti nyadi bansa minoriti menua tu.

Album tu ngemai pesan pengerindu enggau bisi penyelai iya empu kelebih agi ba renggat tusun tiun nyengkaum begulaika leka lagu enggau tiun ti begunaka urung setaun pengelama endur iya tembu ditengkebang.

 

NAMA BESAI… Kaban band ÁT ADAU ti ngemai enggau ngangkatka tiun asal komuniti Dayak. – Gambar pemeri Facebook ÁT ADAU.

Tengkebang album kedua tu asil ari pemujur album keterubah sida benama Journey (2016) ti udah diterima komuniti dunya.

Naka Februari tu tadi, penuduk album ba tangga ke-35 ba Transglobal World Music Chart (TWMC) lalu ÁT ADAU tu nyadi band Malaysia ti keterubah bisi penuduk dalam carta nya.

Penatai asal band ÁT ADAU ari Sarawak ti udah ditumbuh dalam taun 2014 ti mantaika tiun muzik asal Dayak, Sape, enggau munyi utai ditempap enggau ditabuh.

Sida betubuh enam iku tu benama Jackson Lian Ngau (pemungkal band), Meldrick Bob Udos, Luke Wrender David, Ezra Tekola, Cedric Riseng enggau Alfanso Mckenzie ti chukup pechayaka muzik bisi kuasa ngelui ari semua dinding enggau penekul budaya, penempa, umur, bansa jaku enggau bisi penemu.

NGETAN PENULIN… Sebansa kereban ditebah bansa Orang Ulu ti mansutka tiun ayun lundai. – Gambar pemeri Facebook ÁT ADAU.

Ngelansa pasal penatai nama ÁT ADAU nya empu, begulaika dua leka jaku datai ari dua bansa jaku iya nya ÁT dalam jaku Bidayuh ngemai reti akar seraya ADAU dalam jaku Kenyah ngemai reti kayu ti dikena ngaga Sape.

Nama ÁT ADAU majak pegari sereta suah dikenang sida ti rinduka tiun muzik asal nadai ngira bansa enggau menua ba pemujur sida nurai nama sereta ngangkatka diri ba tikas entarabansa.

Band sida mega bisi dikangau merindang ukai semina ba menua Sarawak – World Rain Forest Music Festival, enggau Malaysia aja, tang mujur ngerembaika muzik sida datai ke menua Singapore, Taiwan, Thailand, Australia, China, Korea Selatan enggau London.

Kelimpah ari nya, sida mega temegah ati menang anugerah ungkup album keterubah kelebih agi ba tengkebang muzik video – Best Short Filem Award ari AIFA (2016 enggau 2017).

RAMI… Malam pengerami ngelanchar Album kedua, Oba’ ti mujur diatur ba Rumah Asap Tabuan Dayak. – Gambar pemeri Facebook ÁT ADAU.

Tengkebang pengelain muzik ÁT ADAU ukai semina ngarika asai enggau ekspresyen sida aja tang mega nyereminka ati likun, asai lantang, bebasaka rampa menua asal enggau pengerindu sereta penaluk ti dalam entara mensia serata dunya, nadai ngira asal penatai, daya idup, bansa enggau ngelui ari garis entara menua.

Juluk sida sebuat endang deka bekunsika lagu nengah online ngambika pesan dibai lagu tu datai serap dunya sereta meri pemaik ngagai kaul mensia sereta semampai nyingkang mansang enggau maju ke mua dalam industri muzik tu.

Kereban tu nyengkaum gendang asal, Perutong – seruling buluh ari bansa Bidayuh, Beduk enggau Kidibad – gendang ari bansa Bidayuh, Tekebung – dumbak ari bansa Iban, lalu ditebah begulai enggau kereban moden baka set gendang, gitar elektrik enggau bass.

Raban sida mega ngaduka eksperimen ari begulaika instrumen moden enggau asal ngambika ulih nengkebang tiun ti manah enggau seruran diterima bala peninga.

Pengerami lemai nya mega richah agi enggau penatai khas siku pemain Sape tebilang menua, Mathew Ngau Jau.

Sida mega meri tabi puji besai ngagai Kaunsil Dagang Temuai Sarawak, Malaysia Airlines, Empire Global Media (EMI), Yayasan Karnaen (YK9), Aerodyne Kenyalang Sdn. Bhd., Seth Photography enggau CatSound.co sereta bala bukai ti udah bebendar nyaup ngelaku enggau ngangkatka nama band sida.

MERINDANG… Band ÁT ADAU merindang ngena lagu ti bisi dalam album pemadu baru sida, benama Oba’. – Gambar pemeri Facebook ÁT ADAU.
NYELAI… Sebansa ari kereban muzik asal bisi dikena band ÁT ADAU nengkebang tiun baru. – Gambar pemeri Facebook ÁT ADAU.
RANCHAK… Kaban band ÁT ADAU enda pimpat nebah kereban muzik asal enggau moden. – Gambar pemeri Facebook ÁT ADAU.
ANGKUN… Sebansa gendang ti bisi dikena sida nengkebang tiun lagu dalam album Oba’. – Gambar pemeri Facebook ÁT ADAU.
PESAN PENGERINDU… Gaya gamal album Oba’ ti baru udah dilanchar ujung minggu tu tadi.

 

Suara Sarawak