Orang indu anang malu beperesa pengerai

KUCHING: Urung 120 kes riman pun sarang anak dirikod nyadi ba Kuching ungkup taun 2018.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madah dalam timpuh tiga hari deka bisi siti kes riman pun sarang anak dirikod.

“Ba Malaysia, taja riman tu 90 peratus ulih ditagang nyadi, tang riman tu tetap nyadi lumur dua pemadu tinggi dirikod nyadi ba taun 2018.

“Lalu ba Sarawak ari taun 2012 ngagai 2016, nadai ubah ti besai ba kes riman pun sarang anak ti kala dirikod,” ku Fatimah.

Iya madah nya lebih pengawa bejadika kimpin ‘Sigek Kitak, Sigek Kamek’ digaga Pink & EmpowHer di palan meli barang ti tebilang ditu, kemari.

Fatimah madah bisi sebengkah pemar diasai ba pengawa ngurangka kes riman tu nyadi.

“Entara nya, orang indu malu deka nganjung diri meresa pengerai ba sepital tauka klinik.

“Nengah kimpin tu, orang indu tau meresa diri empu ngena kit ‘careHpV’ lalu nganjung kit nya ngagai makmal, enda ibuh meresa diri ngagai palan pengerai,” ku iya.

Sama bisi ngulu pengawa nya Dekan Fakulti Ubat enggau Sains Pengerai UNIMAS, Dr Tan Cheng Siang, Pengari Menijar Borneo Indah Foo Yi May, enggau Presiden Pink & Teal EmpowHer Dr Abigail Jerip.

BEJADI… Fatimah nyain baner program kelai bejadika kimpin ‘Sigek Kitak, Sigek Kamek’ kemari.