Orang indu nyaup ngatur menua

Urung 30 peratus ari sida dikeandal perintah ulih ngaul diri ba politik manggai taun 2025

KUCHING: Perintah andalka 30 peratus orang indu ngaul diri dalam pekara politik ba taun 2025 ila.

Kepala Menteri Datuk Patinggi Abang Johari Tun Openg madah iya pechaya pekara tu ulih nyadi nyata.

“Diatu lebih ari 25 peratus ari orang indu bisi ngaul diri dalam ngaga pemutus ba sektor-sektor besai.

“Perintah endang andalka orang indu ngaul diri dalam politik kelebih agi ba pengawa ngatur menua,” ku iya.

Datuk Patinggi Abang Johari Tun Openg

Abang Johari bejaku munyi nya lebuh nyaut timbal rambau pengawa beserimbai enggau Pengerami Nutup Program Pematih Ketuai Orang Indu di Palan Aum Borneo Kuching (BCCK) ditu, kemari.

Ku iya, bida kelia enggau diatu bala orang indu ngaul diri ba politik nyata udah mayuh berubah.

“Diatu, mayuh orang indu udah ngambi bagi nyadi Adun enggau Kaban Parlimen lalu angka sida majak nambah.

“Tang lebuh deka milih pengari orang indu dalam politik, dia bisi pekara patut diperati ngambi enda ngachau ruang bilik sida.

“Tu nyengkaum pemendar ari laki sida laban kitai enggaika rumah tangga sida timpang ketegal politik,” ku iya.

ARAP TERUS MUJUR…Fatimah (bediri, tengah) begambar kenang enggau bala penyereta Program Pematih Ketuai Orang Indu ba Palan Aum Borneo Kuching (BCCK) ditu, kemari.

Tambah iya, laki siku indu ti ngaul diri dalam politik meseti meretika tanggungpengawa bini sida ba mayuh sukut rumah tangga.

“Pia mega, anak sida meseti udah besai tauka enda bepanggai ba indai agi.

“Kebuah pia, kitai enggaika anak indu nya enda diintu laban pengawa politik tu amat berat,” ku iya.

Sama enggau program kemari Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah, Menteri Muda ba Opis Kepala Menteri Undang-undang, Kaul Sarawak enggau Perintah Besai sereta Matau Projek Sharifah Hasidah Sayeed Aman Ghazali enggau bala bukai.