KUCHING: Orang kereja Perintah Sarawak meseti berani berunding jauh ke mua bepelasarka pengelurus enggau integriti.
Sekretari Perintah Sarawak, Datuk Amar Mohamad Abu Bakar Marzuki madah, ba dunya ke majak mayuh penguji, orang kereja Perintah Sarawak enda ulih enda landik berunding, kreatif sereta efektif.
“Nya alai, Taun Baru China serak tu disambut enggau chukup pengerami, ngelai Taun Ular berengkah alai ba astrologi China, reti taun tu mai pengaya, pengelantang, pengelandik, transformesyen sereta ngembuan pengulih.
“Semua tu dipadahka kitai setipak enggau tanggungpengawa orang kereja Perintah Nengeri lebih agi maya jeman ke majak kompleks diatu,” ku iya beserimbai enggau Taun Baru China 2025 sehari tu.
Nambahka jaku iya, Abu Bakar madah, pengerindu beserakup mega meseti dikemeran ti tau diambi chunto ari pemakai lama ‘yee sang’ ti ngelai pupu bansa enggau pengelantang.
“Baka ‘yee sang’, Sarawak mega kaya enggau pemayuh pupu raban bansa, jalai pengarap enggau daya idup.
“Pengelebih tu nejuka nengeri kitai nyadi chunto penyerakup pupu bansa,” ku iya baru.
Kelimpah ari nya, ku iya, pekara nya bela nyadika pengering Servis Kereja Perintah Sarawak ke gawa bepelasarka ‘SCS One Team’.
