Orang senang, bepun ari pemedis

Jereki siku-siku mensia bepanggai ngagai pemeri petara taja pia kitai enda ulih diau diri dikena nyapai pemujur tauka penyenang sebaka enggi orang bukai.

Ba dunya tu chukup mayuh orang ke udah teulihka pemujur berekat ari pengeransing sida ngereja utai enggau enda nemu leju.

Nadai ngira pemedis tauka pemar ditapi seagi-agi bedau nyapai juluk sida tu enda mudah mantul ati.

Nyadi pemujur sida tu dikearapka ulih nyadika teladan tauka peransang ngagai genap iku kitai laban jarang orang ke nyengala diberi penyenang tekalanya enti ukai ketegal pengepuh diri empu ngiga jalai nyapai juluk ati.

Siku orang dagang ti tebilang ari menua China iya nya Jack Mah, diatu iya diperita ngerikodka pengaya manggai 39.4 billion us dollar. Suba iya tu kala dikemeluka mensia mayuh.

Iya datai ari ruang bilik ke chukup seranta, maya belajar ba kolej iya kala ngulu pengawa intebiu gawa ba 30 bengkah palan di Hangzhoue nyengkaum KFC tang semua peminta iya ditulak.

Nitihku tusi Jack Mah, 24 iku ti ngulu intebiu ba KFC, 23 iku diterima semina iya aja enda diterima. Pia mega maya nguji intebiu nyadi polis, 5 iku ke datai 4 iku diterima semina iya aja enda diterima.

Maya ngulu intebiu gawa ba restauran 4 bintang, iya enggau petunggal iya bisi nyereta intebiu betulis, taja bulih pemutus ke manah, petunggal iya aja ga dipilih iya empu ditulak.

Udah nya maya minta kereja ba havard, iya ditulak 10 kali. Nyau pengujung iya ulih nempa pelasar dagang bejual beli ke dikumbai Alibaba.com Jack Ma mujur nyadi entara orang dagang ke penuh enggau cherita pemedis pengidup kena tulak ke pemadu tebilang di dunya.

Pia mega sapa kitai enda ngelala orang pemadu pintar ba dunya iya nya Albert Einstien. Siku orang fizik ari menua Jerman ada ba taun 1879 kelia.

Nitihka cherita Albert enda nemu bejaku nyentuk umur iya 4 taun. Iya ngambi awak belajar nulis kediri. Pekara tu mayuh orang meragam Albert ngembuan IQ ti lemi.

Taja pia, Albert tu mansang besai nyadi siku orang ti pintar. Ba taun 1907 iya udah minta nyambung pelajar ba tikas Ijazah Doktor Falsafah (PhD) ba University of Bern tang ditulak.

Albert enda mantul ngujungka iya ngaga mayuh macham pansik enggau keretas kereha dikena ngulihka setipikit nyadi doktor lalu pengujung iya diterima nyadi pengelicha ba endur nya.

Kelimpah nya, Micheal Jordan siku jaguh main basketball ke dikelala ba serata dunya. Maya ba sekula primari iya enda diterima ba main basketball laban ke ngembuan peninggi semina 5 kaki 10 inchi.

Kenu ku Micheal, bekau ari nya iya pulai ke rumah terus nambit pintu lalu nyabak.

Pekara nya ngujungka Micheal ngeransing diri belatih ninting hari, peninggi iya mega bisi nambah 4 inchi.

Udah nya baru iya diterima dalam tim main basketball sekula. Ari ulah enda nemu tepantup ati Micheal seruran bebendar belatih ngujungka sehari tu iya siku ari orang tebilang.

Siochiro Honda siku agi orang tebilang mungkal serikat Honda, nemu kita sebedau honda ditumbuh, iya kala ditulak gawa nyadi injinir entukar ba Toyota Motor Corporation.

Urung dua taun iya ngambi awak nempa teknologi piston ulih diterima nyadi injinir di Toyota tang pengawa ke digaga asil ari dua taun nya mega enda diterima toyota.

Asa enggau nya iya badu gawa seraya ngiga chara baka ni ngemanah agi perengka piston ke digaga iya.

Maya jeman perang dunya, dia Honda bisi nguji ngaga motosikal lalu ukai kerita.

Pengudah bebendar ngaga motosikal kediri, abis perang dunya kedua ekonomi Jipun pan labuh.

Dia mayuh rayat Jipun enda ulih meli kerita lalu sida milih meli motosikal.

Pangka ari nya mih pengidup honda terangkat nyentuk ke sehari tu. Iya mujur ngaga serikat honda nyadi seriktat entukar besai ke tebilang ba dunya.

Kelimpah ari sida tu mayuh agi orang bukai nyangka ngasaika ke pekara ke lebih pedis maya enda diterima gawa tauka bisi penekul bukai ngujungka sida dikemelu.

Kekadang penekul nya mih ti nyadika peransang mayuh bala bakih tauka orang ke dipeda senang tau teulihka pemujur ti enda disadang kitai. Nya kebuah anang mudah mantul ati seagi empai tepantup ba bandir.

Pia mega, enti kitai ngasaika bedau tepantup enggau pengulih ke dijapai diatu anang sesekali berasai asa. Angap semua nya pemungkal singkang, mupuk begadai.

Lebuh pedis kitai tau ngetu dulu, udah nya angkat baru napi utai ti nekul laban nya semina sementara aja, sigi baka iya penguji ba dunya injau.

Pajakka pengawa nambahka penemu, betanya sereta ngeransing diri awak kitai tau teulihka penyenang tauka pengelantang sebaka enggau orang bukai. Tuhan merekat!

Suara Sarawak