Orang Ulu megai rikod dunya ngaga tikai rutan pemadu panjai

KUCHING: Sarawak chukup tebilang enggau pengeraja asal sereta mayuh asil babas baka rutan, buluh, bemban tauka ke bukai digaga nyadi asil pengelandik jari ti manah.

Peranak Orang Ulu mechahka rikod dunya pengudah tikai rutan enggau pemanjai 1.17 kilometer (KM) ngalahka rikod ke kala digaga komuniti Sweden enggau pemanjai 749 meter.

Nitihka penerang, tikai nya digaga ngena 1.4 tan rutan!

Rikod nya digaga ba taun 2016 ke alai bisi 400 iku komuniti ari menua Belaga, Baram enggau Murum mai nama Sarawak ngagai tikas rikod dunya.

Projek ngaga tikai pemanjai 1.17 KM nya sebagi ari projek ti diatur Gerempung Peng Doh Belaga.

TIKAI PEMADU PANJAI… Komuniti Orang Ulu ari 24 uma panjai bekerejasama nembuka projek ngaga tikai rutan pemanjai 1.17 KM ba taun 2016. (Gambar Facebook Mukah News)

Ba sebengkah berita, Chairman gerempung nya, Datin Seri Debong Anyie madahka bisi 24 genturung pendiau tauka uma panjai Orang Ulu beserakup sereta bekerejasama nembuka projek tikai nya.

Sida nya nyengkaum raban bansa Kenyah, Kayan, Penan enggau Lahanan.

Ku Debong, projek nya berengkah dipejalaika sida kenyau ari bulan Februari 2016 lalu tembu ba bulan September 2016.

Debong madah bala penyereta projek tikai nya endang chakah sereta ngembuan semengat ti tinggi nyentukka proses pnembu ngaga tikai nya.

Tu mega siti ari chara pengawa beranyam kelebih agi pengawa lama deka dipeturunka ngagai raban nembiak rebak baru, ku iya.

RIKOD DUNYA… Gerempung Peng Doh Belaga nerima setipikit Rikod Dunya Guiness ba taun 2016 laban udah mujur ngalahka rikod tikai pemadu panjai sebedau tu ti dipegai komuniti Sweden.

Kelimpah ari nya, Deborah mega madah projek nganyam tikai nya digaga raban orang tuai enda ngira indu tauka lelaki berumur urung 78 taun ngagai sida ke pemadu biak entara umur 20 taun.

Tikai tu nyadi siti kereban endur duduk sereta lap kaki ti pemadu beguna ngagai komuniti Orang Ulu sereta Dayak kelebih agi apin kerusi berengkah dikena ba menua ulu.

Pengawa beranyam tu endang digaga raban orang indu ari komuniti nya.

Ba pengawa melah pinang tauka ngintu pemati, tikai endang suah dipeda kitai diengkah ba ruai lalu ba komuniti Orang Ulu kelia, tikai dikena sida malut tubuh niang ke nadai nya.

Ba komuniti Orang Ulu, ukir tauka kalong enda digaga sebarang laban nya mandangka pangkat tauka tikas pengidup sida.

TIKAI PEMADU PANJAI… Komuniti Orang Ulu ari 24 uma panjai bekerejasama nembuka projek ngaga tikai rutan pemanjai 1.17 KM ba taun 2016. (Gambar Facebook Mukah News)

Pangkat tu nyengkaum maren (orang kaya), hipui (raban renggat tengah), panyin (orang renggat baruh) sereta dipen (ulun).

Tu enda salah baka bansa Iban ti enda tau ngembuan ukir pantang sengapa kelia laban nya mai reti sereta tuju diri empu.

Pengawa nyukat sereta ngaku Rikod Dunya Guiness tikai nya rambau suba dipenyadika Menteri Pemansang Orang Indu, Ruang Bilik enggau Komuniti rambau nya Datuk Seri Rohani Karim di Dewan Komuniti Skim Genturung Pendiau Baru Bakun Sungai Asap, Belaga.

Berebak enggau nya, projek nya mega bulih sponsor ari Sarawak Energy Berhad (SEB), Yayasan Kebudayaan Dayak enggau Opis Menteri Komunikasyen enggau Multimedia Malaysia.

Ba taun 2017, tikai rutan nya dibantaika ba Festival Filem enggau Anugerah Entarabansa Asean (Aiffa) ti atur 4-6 Mei ba taun nya.

Sapit Kepala Menteri Datuk Amar Douglas Uggah Embas lebuh bejadika Aiffa rambau nya madahka penyulut ti digaga komuniti Orang Ulu nya ukai semina mai nama Sarawak tang mega Malaysia ngagai tikas entarabansa.

Iya ngarapka bala nembiak rebak baru deka ngemerankan pengawa beranyam kelebih agi asil pengelandik jari ari genap raban bansa sereta komuniti ba nengeri.

Tu ukai semina deka meri rega ti besai ngagai makit dunya tang mega nambahka penatai pemisi komuniti kelebih agi sida ke diau ba menua ulu enggau menua pesisir.

TIKAI PEMADU PANJAI… Komuniti Orang Ulu ari 24 uma panjai bekerejasama nembuka projek ngaga tikai rutan pemanjai 1.17 KM ba taun 2016. (Gambar Facebook Mukah News)