OUCC nyilih rumah Orang Ulu ti ‘lenyau’

KUCHING: Pengawa nirika Palan Main Asal Orang Ulu (OUCC) di Mengeri Besai Miri deka ngangkatka agi main asal enggau pesaka bansa Orang Ulu di Sarawak.

Kaban Kaunsil Pelilih Marudi Kausilor Margaret Uding Nawan madah, urung 20 taun sebedau tu, bisi perambu nirika sebuah Rumah Orang Ulu di Kuching enggau sebidang tanah udah mujur diulih.

Taja pia ku iya, komuniti Orang Ulu ‘lenyau’ tanah nya pengudah presiden serakup rambau nya nukar tanah nya ngagai seluntang rumah kedai.

“Lebuh kami diberi seluntang rumah kedai, mayuh komuniti Orang Ulu berasai enda lantangka pekara nya laban rumah kedai ti diberi enda ngarika komuniti Orang Ulu.

“Rumah kedai tu tau diulih ba sebarang endur tang ngembuan sebuah Rumah Orang Ulu ti ngarika komuniti minoriti ukai baka nya chara iya,” ku Margaret ti dirandau lebuh ngulu Pengerami Nerima Pengabang Hari Raya Aidilfitri Kepala Menteri apin lama ke udah.

Kausilor Margaret Uding Nawan

Kenu ku Margaret, kenyau ari nya, bemacham pengawa udah dipejalai komuniti Orang Ulu dikena ngulihka baru Rumah Orang Ulu ti ‘puntan’ sebedau tu.

Pengawa pemadu baru ku iya nengah forum gerempung Orang Ulu taun nyin tadi ke alai komuniti Orang Ulu ti ngari sekeda serakup minta Perintah Sarawak meri sebidang tanah ngagai komuniti Orang Ulu.

“Kitai minta sebidang tanah lalu kitai nagit tanah tu di Miri sereta peminta udah dikemendarka Kepala Menteri Datuk Patinggi Abang Johari Tun Openg.

“Pengawa nirika sebuah Rumah Orang Ulu tauka dikumbai OUCC di Miri engkeman amat laban majoriti komuniti Orang Ulu diau mendam dia,” ku iya.

Ketuai Indu PBB Telang Usan nya nambah, OUCC tau mega dikena nyilih rumah Orang Ulu ti ‘lenyau’ sebedau tu.

“Pengawa nirika OUCC di Miri patut amat laban komuniti Orang Ulu sekalika ari Belaga enggau Baram ulih datai begempuru dia.

“Kitai meri terima kasih ngagai Kepala Menteri laban siruka pengelantang bansa minoriti baka kami,” ku iya seraya nambah, OUCC deka nyadi kelai baru bansa Orang Ulu di Sarawak laban deka didiri nunda motif Orang Ulu enggau langkar moden.