Palan bedaja di Jalai Alun Shin Yang udah dibuka baru

PAKAN: Sekumbang Atur Mindah Betagang (PKP) sebedau mayuh pedaja lebih agi sida ke bejual asil babas ngasaika pangka pandemik Covid-19 beduduk ari nadai ulih bejualka ba tisi jalai.

Tang diatu, pengudah masuk renggat kedua Pelin Ngemanahka Menua (PPN) dia sida dipeda udah belabuh bejual baru ba sebelah tisi jalai nyengkaum kaki lima ba sebelah pasar.

Siku orang bedaja ari Rumah Ungon,Darau ditu iya nya Pawa Anak Benang,55 taun nusuika sebana diri sekumbang pengerekai pandemik Covid-19.

Pawa bekunsi palan bejual enggau tiga iku agi bakih bukai ba tisi Jalai Shin Yang, enda jauh ari Jematan Sungai Sugai urung 10 Kilometer ari Pasar Pakan ditu.

“Naka iya tusah kami sebuat sebedau tu, lama kekalat begigaka chara deka bejual laban palan bedaja ba tamu di pasar Pakan ditutup.

PAWA ANAK BENANG

“Nya alai, kami bisi berunding enggau Balai Polis betanya pekara ke ulih digaga, bekau ari nya dia kami dikemendar bejual baka selama.

“Taja dikemendarka bejual baru tang kami dilalau ngambika terus nitihka SOP,” ku iya ke udah bejalaika pengawa bedaja kenyau tiga taun ke udah.

Nangkan ke nya, Pawa ngenang penyamai suba kala teulihka jereki manggai RM1,000 tang lepas pangka Covid-19 pedis deka ngiga RM500 sebulan.

Nya alai, bela besampi mih kitai ngarapka penyakit tu jampat suman sereta kitai bela enda nangi begigaga belanja tambah.

Berebak enggau nya, Pawa mega arapka perintah ulih berundingka bantu ke patut ngagai sida ke bedaja.

Suara Sarawak