KUCHING: Palan Pemansut Produk Asal, Palan Biodiversiti Sarawak (SBC) diatu bisi 22,000 strain mikrob idup.
Tuai Pegawai Eksekutif SBC Dato Dr Yeo Tiong Chia madah, penyampau nya nyau deka sebaka penyampau enggau koleksyen dunya, iya nya koleksyen budaya Betanam Betupi enggau BioSains Antarabansa ba United Kingdom.
Ku iya, palan nya diatu mega ngumpul 26,000 pemansut utai tumbuh ti dipadah bisi kaul enggau penemu asal komuniti ba nengeri tu.
“Unkup penerang, koleksyen budaya Betanam Betupi enggau BioSains Antarabansa ba United Kingdom, siti ari koleksyen pemadu besai ba dunya ti bisi lebih 30,000 mikrob idup ari 142 menua.
“Reti iya ba Sarawak, kitai nyau deka sama penyampau enggau siti ari koleksyen pemadu besai ba dunya,” ku iya.
Tiong Chia bejaku munyi nya lebuh Pengerami Makai Lemai Ngintu Genap Taun Ke-25 SBC ba Palan Konvensyen Borneo Kuching (BCCK), tadi.
Ngenang lenak agi ku iya, penyelai palan pemansut nya mega laban ngena Artificial Intelligence (AI), ti mantu pengkalan data kimia enggau ulih mai pemujur ba bemacham pengawa baka pemakai enggau biofuel.
“Organisasyen ti melanja pansik tu ila deka meda ‘pemerega’ aset biodiversiti tu,” ku iya.
