Panggau Krismas SibuFM 24 Disember tu

SIBU: Mensia mayuh diau ngelingi Sibu ditesau sampal datai berami enggau Panggau Krismas Sibu FM 2019 ti deka diatur ba Pintu Besai Wisma Sanyan kena 24 Disember tu berengkah ari pukul 7 lemai nyentuk 10.30 malam.

Program diatur Radio Televisyen Malaysia (RTM) Pampang Sibu begulai enggau Palan Servis P212 Sibu enggau Wisma Sanyan nyadi pengatur endur tu mega bisi ngangauka Kaban Parlimen Sibu Oscar Ling Chai Yew bejadika pengerami nya.

Kenu ku Pengeluar Program, Lucia Thomas Kasau, tu program ninting taun SibuFM enggau tuju ngerami batang pengerami Krismas begulai enggau serap komuniti ngelingi Sibu.

“Nengah Panggau Krismas tu kitai ulih ngempung semua komuniti nadai ngira asal penatai, pengarap enggau adat dipegai sida bela begulai ngintu pengerami Krismas taun tu di Sibu.

“Program tu mega entara pengeran kami nyadi stesyen radio ke bisi ba zon tengah tu merindang semua peninga enggau nyadi pelasar semua kami betemu mua enggau bala peninga,” ku iya madah ngagai Suara Sarawak.

Ku Lucia, entara artis bisi dikangau datai merindang malam nya iya nya Hellena, Dicky J Ding, Ricky El, Eisner Nala, Josephine Jalin, Alex Moh nyengkaum Bunyau enggau Mujap.