KUCHING: Parti Pesaka Bumiputera Bersatu (PBB) terus ngetanka penuduk nyadi parti politik dominan di Sarawak enggau bala tuai ti tegap sereta ransing nuju penyerakup.
Sapit Presiden PBB I, Datuk Amar Douglas Uggah Embas madah, kenyau ari ditumbuh, PBB udah suah belidar tuai ti lanchar iya nya bepun ari niang Tun Temenggong Jugah Barieng, diteruska Tun Abdul Rahman Yakub, Tun Pehin Sri Abdul Taib Mahmud, enggau Pehin Sri Adenan Satem.
“Diatu, kitai betuah laban bisi Premier Sarawak, Datuk Patinggi Tan Sri Abang Johari Tun Openg ti chukup pintar nyadi tuai. Iya bisi juluk besai, tegap runding enggau liat ati ngemansangka Sarawak.
“Peda aja Sarawak diatu, kitai nyadi siti wilayah berpenatai tinggi ke alai ba taun 2024 pemadu tinggi, manggai RM14.2 bilion.
“Tu pemujur dijapai nengah bemacham pemansang ti deras, kelebih agi pengudah bejalaika Strategi Pemansang Pengudah COVID-19 (PCDS) 2030.
“Kitai naka ulih ngangkatka Sarawak nyadi nengeri maju enggau rayat ngasai pengelantang ekonomi, serangkung sosial, enggau pemeruan rampa menua,” ku iya.
Uggah ti mega Sapit Premier Sarawak bejaku munyi nya ba randau khas di Opis Sapit Premier Sarawak (TPS) ditu tadi.
Iya madah, struktur nyelai dalam PBB ti meri perati ngagai gempung entara sayap Pesaka enggau Bumiputera besai endar reti dikena ngetanka pengelantang dalam parti.
“Selubang penemu ti dikemeran kenyau ari renggat baruh – bepun ari Ranting nyentuk renggat pampang, nentuka bala tuai belidar gawa enggau lanchar.
“Pesaka bisi tuai iya empu, pia mega Bumiputera, dikena nyeliah sebarang penyarut lalu penemu baka tu udah lama dikemeran ngambi penuduk PBB terus entap,” terang iya.
