MIRI: Jum Start BIZNES! Jelajah Pedagang Biak SABERKAS Siri ke-6 2024 udah nyendiaka pelasar ti beguna ngagai pedagang biak ngulihka penemu bekaul dagang.
Sapit Menteri Nembiak, Lumba enggau Pemansang Orang Dagang Sarawak, Datuk Dr Ripin Lamat madah, nya mega palan endur sida diembing bemacham ejensi ti bekaul.
Ku iya, Gerempung Raban Nembiak Beserakup (SABERKAS) udah bejalaika inisiatif tu dikena nyendia pelasar ngagai raban nembiak ngerebut peluang bedagang ke udah disedia nengah duit jali, tauka chara bantu penuh.
Iya madah munyi nya ba Pengerami Nangguhka Jum Start BIZNES! Jelajah Pedagang Biak SABERKAS Siri ke-6 2024 ditu, kena Hari Enam.
Ku Ripin, siti pelasar pengawa matau, ngelaku enggau ngulu program pedagang di nengeri tu iya nya Pangkalan Data Peedagang Sarawak deka ditumbuh tengan taun 2025.
Ku iya, lebuh Sarawak bisi pelasar baka nya, semua data deka muntang dipeda enggau diseraris. -EDISI UKAS
