Pedas besaup ngintu rabat niang Keduka

SIBU: Idup belalauka adat basa enggau ati kasih ngasuh bala kaban Serakup Dayak Sarawak (Pedas) ditu ngasaika diri menggi tanggungpengaw besai ngintu rabat ngena chara ti patut.

Ku Sapit Ketuai Pampang Pedas Sibu, Jenggut Atan, sida sebuat nerima berita sinu pemidang siku lelaki benama Keduka Anak Ayol, 51 taun, ti nadai kaban belayan ngesah pemati niang.

“Nitih ku penerang diterima kami, niang Keduka tu asal ari Nanga Selibut, Sungai Song di Song Kapit lalu diau nyuwa di Sibu ditu.

“Niang tu kira nadai pendiau tauka tau dikumbai kitai nadai meruan rumah lalu enda nemu baka ni deka mesanka kaban belayan tudah di menua laban kitai enda nemu deka mesan nuju sapa lalu nadai seling penemu baka ni gaya kaul iya enggau diri sebala.

“Tambah mega kami nadai diterang silik pasal batang pengawa sereta sapa bagi orang sebilik enggau niang.

SINU… Bala kaban Pedas Sibu diuluka Jenggut Atan (bediri kiba) begelumu nyengai niang Keduka di Bukit Lima ditu.

“Tang ketegal sinuka bansa diri kami sebuat lalu mutuska penemu ngintu rabat iya,” ku Jenggut ngelansa lebuh dirandau Suara Sarawak.

Jenggut madahka niang Keduka parai ketegal sakit di Sepital Sibu urung pukul 2 dini hari kena 1 Ogos tu tadi. Dulu ari nya, kaban Pedas Sibu mega bisi ngabas niang di wad sepital nya.

Ku iya, pengudah betesau enggau bepupuka belanja ari Indu Opis (HQ) Pedas di Miri enggau bala kaban Pedas Sibu, sida lalu meli perau tauka lungun enggau lot pendam ba Pendam SDNU di Jalai Teku ditu.

“Pengudah tembu mandi enggau ngari niang, kami lalu nyimpan tudah dalam lungun sereta disengai semalam di Bukit Lima ditu.

“Tumu pagi 2 Ogos tu tadi, niang dianjung lalu ditumbak ba lot pendam ti udah dibeli hari dulu.

“Kitai berasai lantang ati pengawa rabat niang Keduka tu mujur taja ati agi sinu ngenang nasip tudah,” ku Jenggut.

Nikalka kenang ngagai penusah kitai bansa ti midang sebelah mengeri, nadai ngira ketegal sakit tauka penusah bukai ti nadai kaban belayan ngesah, endang patut diperunding.

Nya kebuah ku Jenggut, kitai enda tau sesekali muai menua enggau kaban belayan diri taja nitihka periuk asi, bekereja di mengeri.

“Kitai patut pulai ngundang menua, enti sema enda ulih suah limpang, abis nadai sekali setaun, nanya berita kaban belayan baka bala serumah, diri menyadi enggau bala petunggal.

“Penusah baka tu suah amat udah nyadi lalu tu kedua kami kami Pedas Sibu mutarka iya. Kes keterubah suba, niang Sebeli Anak Katan.

“Kami Pedas endang naka ulih mantu kitai bansa ti dituntung penusah laban berundingka nasip kitai siku-siku enda sebaka lalu penusah tau nyadi sebarang maya, nadai bebah. Tambah dibai ati sinu enggau kasih,” ku Jenggut madah nyemetak.

Ku iya, penusah baka tu ngajar kitai pasal kaul begulai enggau pangan diri lalu patut nyadika lalau enggau tenggau ba pengidup kitai besehari sehari.

Suara Sarawak