KUCHING: Perambu nikika chaj servis pengerai ngagai raban orang pemisi ba Keretas Burak Pengerai (HWP) enda ngeruga raban B40.
Kaban Parlimen Bandar Kuching ti mega Penyanding Penemu Khas Menteri Pengerai, Dr Kelvin Yii Lee Wuen madah, perambu HWP Opis Menteri Pengerai (KKM) nya sebagi ari pengawa meri bantu enggau nyaga pengerai raban nya.
“Aku nyemetak madah, kami bepegai ba polisi pengerai ti mungkur semua lalu tu mai reti orang seranta tauka raban B40 deka seruran dibantu enggau dijaga ba sukut pengerai.
“Isu tu benung dipansik ukai semina raban pakar pengerai tang raban ekonomi dikena nyendia agih belanja penuh tang aku meri jamin enti perambu tu dikemendar lalu tu deka dipejalai berenggat,” ku iya.
Kelvin mansutka jaku nya rambau dirandau pemberita bekaul penerang KKM kena Hari Tiga tu tadi pengudah bejadi Program Nyuaka Kereban Pengerara Api ngagai komuniti Kampung Selangan Batu ditu, sehari tu.
Ku iya, keretas burak reformasyen pengerai nya dilanggur nyadi pelin reformasyen pengerai timpuh pandak, jelan enggau panjai nyentuk 15 taun.
“Tu sekeda inisiatif besai ti beguna dikena nangkup ungkus pengerai enggau tating penyakit ti majak nambah ba rayat ba menua tu.
“Sebengkah model ti benung dipansik kami baka pengawa nambahka agih belanja sistem pengerai ngambi pesakit bulih servis berubat ti meruan,” ku iya.
