SERIAN: Pekit Berakit Serian Edisyen Ke-11, 2023 ti ditaga nyadi ari 8 nyentuk 9 September tu disadang meri peneleba ti narit ati ngagai pengusung enggau bemacham aktiviti kelimpah dua pekit besai iya nya pekit berakit enggau Ratu Bilanting.
Kaban Parlimen Serian, Datuk Seri Richard Riot Jaem madah, ba pekit berakit, pengawa ti narit ati nya disadang dipasuk 187 tim ti deka betapat ngayuh rakit penyauh 25 kilometer belabuh ari Kampung Tema Mawang, Tebedu lalu tembu ba Kampung Tebakang Bidayuh.
“Tim ti masuk pekit ba taun tu nambah enti dibanding 140 tim ba taun ti udah lalu nya ukai semina dipasuk peranak Serian, Padawan tauka Kuching tang mega ari selampur Sarawak nyengkaum sekeda tim ari Semenanjung Malaysia enggau Indonesia,” ku iya ba aum media di opis Kaunsil Pelilih Serian ditu, kemari.
Ku Riot agi, kategori ti dipekit iya nya Tebuka Lelaki, Tebuka Indu, Tebuka Nembiak, Tim Champur (lelaki enggau indu) Perintah/Ejensi sereta Tim Champur (lelaki enggau indu) Ejensi Dagang Temuai.
Ku iya, semua kategori nya nyendiaka perais mata duit RM1,500, RM1,200, RM900 enggau RM250 sereta trofi ungkup pemenang lumur satu, lumur dua, lumur tiga enggau sagu ati (lumur empat nyentuk lumur sepuluh).
Ungkup Ratu Bilanting, Riot madah, bisi 10 finalis deka mantaika bakat sida kena 8 September, sebedau bepekit ngerebut gelar nya malam 9 September.
“Finalis ti dipadu nyadi Ratu Bilanting deka mai pulai mata duit RM1,500, jumpang enggau trofi lalu lumur dua enggau lumur tiga nerima RM1,000 enggau RM750 sereta trofi.
“Lumur empat nyentuk lumur 10 mega deka nerima sagu ati RM200 lalu finalis ti dipadu nyadi ‘Miss Photogenic’ nerima RM400,” ku iya.
Berebak enggau nya, Riot madah, pengelama dua hari Pengerami Cabaran Berakit Serian nya nyadi, bemacham pengawa bukai mega deka diatur baka panggau pemerindang, pekit karaoke, sukaneka enggau bansal bejual.
Ku iya, kelimpah ba genturung Kampung Tema Mawang, pengawa bukai nya mega diatur ba laman Pasar Tebakang China.
Riot madah, Pekit Berakit Serian Edisyen Ke-11, 2023 diatur Kaunsil Pelilih Serian enggau kerejasama Palan Servis Parlimen Serian lalu disukung Opis Menteri Dagang Temuai, Industri Kreatif enggau Seni Pemerindang Sarawak ti meri agih belanja RM118,000 dikena ngemujur pengawa nya ti mega dirintai dalam Kalinda Dagang Temuai Sarawak.






