BAU: Pelajar di pelilih Bau patut nyingkang nitih juluk pemansang empas besai The Greater Bau nyadi penyungkak besai nempa rebak dudi ti kompeten, besemekih enggau bisi rega diri.
Sapit Menteri Pengangkut Sarawak (Sungai enggau Tasik) ti mega Kaban Kunsil Nengeri (ADUN) Tasik Biru, Datuk Henry Harry Jinep madah, pelajar patut nyadi tiang nempa kuing pemansang Bau ti deras mansang nengah agenda nya.
“Pelilih Bau benung nuju pemansang ti deras agi nengah agenda The Greater Bau iya nya juluk pemansang empas besai ti ngemerat pemansang ekonomi, sosial, infrastruktur enggau pengelantang rayat.
“Ba sukut nya, pelajar nyadi tiang ti deka nentu pemansang Bau dudi hari,” ku iya.
Henry bejaku munyi nya rambau bejadi Program Apresiasyen Penyulut Sekula Opis Pelajar Pelilih (PPD) Bau 2024 ditu, empai lama.
Iya andal pelilih nya nyadi pemungkal penyulut pelajar di Sarawak lalu sekula ngesan pangku pengawa besai nyadi palan pemansang penau, inovasyen enggau penau nyadi tuai ba raban nembiak.
Ku iya, inisiatif nya begunaka pengawa negap bala pengajar nengah latih enggau sukung profesional, kerejasama ti tegap agi entara sekula, komuniti enggau industri kelimpah nentu nadai nembiak tinggal tauka pengulih sida enda diansah
. “Pelilih Bau patut angkat ukai semina nyadi pelilih ti kaya enggau pesaka sereta budaya tang nyadi siti pelilih ti nyulut ba pelajar,” tampung iya. – EDISI UKAS
