KUCHING: Kaul kerejasama entara Kelab Teokhiaw Kuching enggau Universiti Normal Hanshan ulih meransang pengerembai kaul main asal sereta pelajar dua menua iya nya Malaysia (Sarawak) enggau China.
Premier Sarawak, Datuk Patinggi Tan Sri Abang Johari Tun Openg andal inisiatif dipejalai gerempung pemadu tuai nya ngangkat kaul mensia mayuh dikena negap kerejasama pelajar entara dua menua ti lebih manah agi dudi hari.
“Komuniti Teochew ngemerat pelajar enggau pengawa dagang ti mantu ba pemansang menua, ekonomi rama enggau pelajar dikena nempa ulah mensia ti manah.
“Aku ngarap inisiatif besilih nembiak tu ulih ngangkat kaul mensia mayuh ba pemereti ati enggau kaul ti manah agi entara dua menua,” ku iya.
Abang Johari mansutka jaku nya lebuh teks jaku iya dibacha Sapit Premier Sarawak, Datuk Seri Dr Sim Kui Hian ba pengawa makai lemai nyerumba genap taun ke-102 Kelab Teokhiaw Kuching enggau 60 Taun Sarawak Merdeka ba sebuah restoran ba Jalai Tabuan, malam kemari.
Iya meri tabi puji ngagai pemujur gerempung nya ti mujur diberi setipikit puji ari pengerejister gerempung laban nyadi gerempung pemadu tuai sereta aktif ti direjister ba nengeri tu.
“Selamat maju ngagai pengajar enggau nembiak ari Universiti Normal Hanshan China ti begulai enggau Kelab Okestra Teokhiaw.
“Asai meh peneleba kampung ujan tropika enggau adat Borneo ti bisi ba Kuching, Sarawak.
“Kerejasama tu dikeandal ulih meransang pengerembai pelajar main asal enggau pelajar entara Sarawak enggau China,” ku iya.
Iya madah, rampa budaya Sarawak ti nyelai meri pemaik ngagai semua etnik ba nengeri tu ngetanka pesaka penyerakup enggau pengelantang ngelama tu.






