Pele ngangkat sumpah Sekretari Dun S’wak baru

KUCHING: Pele Peter Tinggom diatu Sekretari Aum Kunsil Nengeri (Dun) ke baru, nyilih Semawi Mohamad.

Iya ngangkat sumpah ba mua Speaker Dun, Datuk Amar Mohamad Asfia Awang Nassar di Kompleks DUN ditu tadi.

Pengawa nya mega dikemata Sapit Speaker Dun, Datuk Gerawat Gala enggau Sapit Sekretari Dun Sharifah Shazzea Wan Akil.

Pele, 48 taun, sebedau tu kala nyadi Sapit Sekretari Dun berengkah ari Februari 2011 nyentuk Mei 2015.

Nya alai, Asfia madahka Pele engkeman amat dipadu mangku pengawa nya bepelasarka peneleba iya gawa sebedau tu ukai semina kala gawa ba Dun aja tang dala opis menteri sekalika ba renggat Perintah Sarawak enggau Perintah Besai.

“Aku nerima manah penatai iya ngagai Dun,” ku Asfia beserimbai enggau pengawa sehari nya.

Pele meri terima kasih ngagai Perintah Sarawak ti udah ngelempaika pengandal sereta pechayaka iya ulih ngemujurka tanggungpengawa nyadi Sekretari Dun.

“Aku deka naka ulih bejalaika pangku pengawa diri ba Dun,” ku iya.

Suara Sarawak