KUCHING: Pemansang penatai biodiversiti Sarawak patut dipejalai enggau meruan dikena nentuka komuniti orang asal ti meri bantu ulih ngasaika pemaik ekonomi nengah ari pansik enggau pengawa komersial.
Menteri Pelajar, Inovasyon enggau Pemansang Penau Sarawak, Datuk Sri Roland Sagah Wee Inn madahka pengawa nya begun a dikena nemba peluang ekonomi ti manah agi ngagai komuniti.
“Kelimpah ari nya, pekara tu tau digaga ngambika biodiversiti nengeri ulih dikena enggau meruan.
“Nya alai, Palan Biodiversiti Sarawak (SBC) mega tanggungpengawa ti begun a dalam nentuka pejalai praktikal Pemun enggau Bekunsi Pemaik (ABS), sereta ngasuh Sarawak nyadi referen ti begun a ba renggat serantau enggau antarabangsa,” ku iya.
Sagah bejaku munyi nya rambau bejadika Pengerami Makai Lemai Ninting Taun SBC 2026 enggau Sempekat Bekunsi Pemaik (BSA) LitSara® ba siti hotel, ditu, kemari.
Ngelansa pasal BSA, palan nya udah nyain sempekat ari Kaunsil Biodiversiti Sarawak begulai enggau enam pengari komuniti orang asal iya nya komuniti Kelabit, Lun Bawang enggau Bidayuh.
Komuniti Kelabit diarika Pa’ Lungan enggau Pa’ Ukat di Bario, komuniti Lun Bawang diarika Long Kerebangan, Long Telingan enggau Long Rusu di Ba’Kelalan seraya komuniti Bidayuh diarika Kampung Kiding, Padawan.
Kelimpah ari nya, Chairman Kaunsil Biodiversiti Sarawak ti mega Pemangku Sapit Sekretari Perintah Nengeri bagi Perambu enggau Pemansang Ekonomi, Datuk Ir Awang Mohammad Fadillah Awang Redzuan madahka sempekat baru nya mandangka penegap enggau kerejasama ti enda ngetu entara SBC enggau komuniti bekaul.
“Kerejasama tu ngelaika pengeransing begulai lebih lutai kita deka ngetanka pengawa bekunsi ti sebelah sereta manah, kelimpah ari nentuka pemansang LitSara® meri pemaik ngelui ari sukut komersial.
“Inisiatif tu mega tau meri empas ngagai pengulih komuniti, meri pun penatai pemisi ti meruan sereta meri basa ngagai orang ti ngempu penemu tradisional nya,” ku iya.
Program nya ngemataika pengawa ngelancarhka tiga produk baru bepelasarka minyak LitSara®, iya nya LitSara® Moisturising Stick, LitSara® Blended Essential Oils enggau LitSara® Relaxing & Sleep Mist.
Pengawa ngasilka produk tu nyadi pengulih SBC ngeluaska bungkur guna LitSara® ngagai pemansang produk ilti berega enggau ngembuan peluang komersial ti tinggi.
Pejalai LitSara® berengkah ba taun 2025 nengah dokumentasyen penau tradisional ti dikunsi komuniti asal sebedau dipasuk ba pansik enggau pemansang saintifik.
Inisiatif tu udah nya nyapai siti agi penyulut lebih BSA keterubah di Malaysia dipadu ba taun 2019 nengah kaul lima komuniti, sebedau dikerembai ba taun 2022 enggau komuniti Lun Bawang ari Long Rusu, Ba’Kelalan.
Kenyau ari sempekat nya dipaduka, komuniti nya udah ngaul diri mekalka lebih 2,000 liter minyak LitSara® ti meri pemaik belanja urung RM2.35 juta lalu diagihka entara taun 2019 nyentuk 2026.
Nangkan nya, lebih RM1 juta pemaik mega diberi nengah pemansang infrastruktur, nyediaka perengkaguna nyulin enggau program nambhka pengulih komuniti.
Pemansang nya udah negapka penyerta komuniti lebih bejelaika aktiviti ngetau, nanam, ngeluarka isi minyak ti meruan sereta pemansang rintai LitSara®. — NUR FARIHAN RAZALI
