Pemain industri kampung enda tau rangka penemu

MIRI: Pemain industri kampung patut bekunsika penemu diulih sida ngambi sama ulih ngemansangka industri nya ba menua tu.

Kepala Menteri Datuk Patinggi Abang Johari Tun Openg madahka anang nyimpan penemu nya ungkup diri empu aja.

Ku iya, industri kampung Sarawak ulih besemekih enggau pemain industri menua luar baka Vietnam, Indonesia, China enggau ke bukai.

“Aku nemu serikat besai baka Samling enggau sekeda serikat bukai bisi aktiviti sida empu sereta sekeda ari tu endang maju endar.

“Tang sayau, sida enggai bekunsika penemu ti beguna dikena ngemansangka industri kampung di Sarawak.

“Sida bekereja ngatika diri aja. Engka ketegal runding deka besemekih entara pemegai lisin nanam kampung (LPF),” ku iya.

Abang Johari mansutka jaku nya kebuh bejadika Seminar Industri Ladang Kampung di Sarawak di Hotel Pullman ditu tadi.

Iya nambah, genap penemu baka asil pansik enggau pemansang (R&D) beguna amat ngagai Sarawak ngambi ulih mansutka kayu ramu enggau produk bisi kualiti agi sereta nambahka produktiviti ladang kampung.

Suara Sarawak