KUCHING: Inisiatif ngangkat sereta meri kelala mengeri tu nengah pemakai asal menua tu endang patut disukung.

Ku Chairman Serakup Dayak Iban Sarawak (SADIA) Krian, Andrew Paul, pemakai asal nyadi kelai pun penatai enggau pengidup peranak asal menua kelimpah ulih ngangkatka nama menua.

“Chara ti pemadu engkeman dikena ngelakuka sebengkah menua tauka mengeri, ba penemu aku iya nya nengah pemakai.

“Pemakai tu mega ulih ngempung kaul kitai bansa taja bisi bida chara mela enggau nama kangau nitihka siti-siti menua,” ku Andrew.

Andrew mega pechaya ari pemakai asal kitai, bansa deka dikelala. Ambika chunto, pansuh, salai, kasam, lempis, pais, panggang enggau ke bukai kelimpah pemakai ari daun babas sereta upa.

“Bansa Dayak dulu menya tebal agi mela pemakai ngena utai ti tumbuh ngelingi sida baka buluh enggau daun kayu.

“Ruas ti diambi ari batang buluh dikena mansuh, ngelulun enggau manduk asi amat enggau pulut.

“Daun kayu baka daun buan, pisang, apong, biru enggau ke bukai dikena mais undai enggau manggang pulut, ngelempis ikan sungai, daun babas enggau bansa engkayu bukai,” ku iya ngelansa silik.

Pemujur Pengerami Pemakai Menua 2018 diatur ba Balai St Jerome, Kaki Wong, Krian kena 26 Mei taun nyin tadi nyata udah ngangkatka nama menua Krian.

“Ari pemayuh tubuh bala ke datai ari penyauh Limbang nyentuk Kuching, bela gagit meda isi program enggau batang pengerami ti bisi disedia.

“Enti sema pengerami tauka Pekit Manduk Lauk Pemakai Asal kitai ulih diatur ninting taun ba rumah panjai, nitihka gintir menua baka Pengerami Pemakai Menua tau amat ngangkatka menua nya,” tandu iya.

Ba penemu Andrew, atur pengawa baka tu mega ulih nerenaka ulah rindu enggau angkunka pemakai asal ngagai rebak diatu enggau dudi hari seraya sida ulih belajarka chara mela enggau landik manduk.

“Reti iya bansa pemakai asal kitai deka meruan bisi orang nemu enggau dikelala rebak dudi lalu kitai ulih ngadu pengawa besai agi jemah baka ngarang bup enggau utai bukai ti deka nyadika pesaka kitai.

“Nya alai kitai ngarap bisi raban deka kiruh besaup enggau kitai ngatur Pengerami Pemakai Menua tu ba menua sida ia empu,” ku iya andal.

Ba langgur Pengerami Pemakai Menua ungkup taun tu, kitai merambu deka ngubah atur pekit ti nyelinting bala nembiak.

“Ambika chunto, magi sida ngena renggat umur ari 15 ngagai 20 taun, sereta enda ngelaungka sida besai tuai. Bansa engkayu deka dipanduk mega tau nyelai tauka bebida ari pekit sebedau tu.

“Pekit sebedau tu pemekit diasuh manduk jani rabat, daun jabang, kasam ensabi enggau upa pantu.

“Bala komiti pengerami patut kreatif agi ngelanggur bagi pemakai asal ti patut dipekit taun tu. “Ngena chara tu kitai ulih nyukat pengelandik nembiak baru ba pengawa manduk pemakai asal,” simpul iya.