Pemansang pelajar nyadi fokus

SARIKEI: Agih belanja besai ti nyaup ngelempung tating belanja apai indai nengah bantu uniform sekula ngayanka penyiru Perintah Sarawak.

Menteri Muda Perambu Mengeri, Pengatur Tanah enggau Rampa Menua Datuk Len Talif Salleh madah, ninting taun Yayasan Sarawak ngagihka belanja penyampau RM4 juta dikena ngemujurka program nya.

Bantu nya ku iya mungkur urung 40,000 nembiak ti patut nerima bantu di selampur Sarawak.

“Di Bagi Menua Sarikei aja, urung RM300,000 diagih ba tuju nya ti mungkur 166 nembiak di Kuala Rajang, 366 di sitak Repok, 35 Meradong enggau 13 Pakan,” ku iya.

Len Talif mansutka jaku tu rambau Pengawa Nyuaka Bantu Uniform Sekula Yayasan Sarawak di Palan Inovasyen Sarikei (SIC) ditu tadi.

KENA MANAH… Len Talif nyuaka pemeri ngagai siku ari penerima seraya dikemata bala bukai, ditu tadi.

Ku iya, Perintah Sarawak tetap deka bejalaika bemacham inisiatif dikena ngenegapka pemansang pelajar di menua tu.

Pengawa numbuhka Opis Menteri Pelajar, Sains enggau Pansik Teknologi (MESTR) mega ku iya nyadi bukti nyata pengeran Perintah Sarawak ngangkatka akses pelajar bekualiti ngagai genap komuniti.

Berebak enggau nya ku iya, Yayasan Sarawak kenyau ari taun 1971 endang chakah bejalaika bemacham program pelajar nentuka genap peranak Sarawak kelebih agi sida ke datai ari ruang bilik seranta ampit nampung pelajar dataika tikas pemadu tinggi.

“Bemacham bantu pelajar disedia enggau belanja manggai bejuta ringgit ninting taun. Nya alai nadai kebuah apai indai madahka anak sida enda ulih besekula semina ketegal suntuk belanja,” ku iya.

Ba lansa bekaul, Len Talif ti mega Kaban Kunsil Nengeri (Adun) Kuala Rajang ngingatka apai indai enda patut ngelempaika semua tanggpengawa ngagai piak sekula aja.

Ku iya, sida patut meri kerejasama nentuka pemujur enggau pelajar bala anak sida enda tejanggal.

“Ulah baka tu patut dibuai nentuka penemu ti diiri ulih dibantai nengah ulah ti menyana.

“Ba atur pengawa bekenaka baucher bantu uniform sekula Yayasan Sarawak tu, aku deka ngingatka pedagang anang beambi ulih, ngiga untung lebih ti enda patut nengah program tu.

“Apai indai patut meresa dulu uniform ngambika setipak enggau rega baucher lalu milih pedagang ti nyendia kualiti barang pemadu manah nipakka rega RM200,” ku iya nangkan.

Sama datai Residen Bagi Menua Sarikei Felicia Tan Ya Hua, Direktor Yayasan Sarawak Azmi Bujang, Pemesai Pelilih Sarikei Christopher Ranggau Unting enggau Pemesai Pelajar Pelilih Sarikei Lau Ngie Tung.