KUCHING: Projek nyeleti lima selingkut jalai ba sepemanjai Jalai Besai Kuching-Samarahan entara 34 projek tejanggal ba nengeri tu, ku Premier Sarawak Datuk Patinggi Tan Sri Abang Johari Tun Openg.
Iya madah, bepelasarka ripot Opis Kereja Raya (JKR) Sarawak naka 27 Januari 2023, ari penyampau 215 projek digaga, bisi 29 projek laun ari timpuh lalu semina 149 projek dipejalai nitihka taga.
“Status projek tu ngirauka ati laban agi tubah projek tejanggal nyengkaum nyeleti selingkut jalai endur nirika lampu trafik pintar udah tejanggal pengelama dua taun.
“Pengudah nerima projek endang nadai pengawa udah dikereja raban kunteriktor dipadu gawa ti ngujungka penanggul jalai sekut.
“Lebuh penanggul baka tu nyadi, perintah ti deka disalah taja penanggul nya bepun ari kunteriktor lalu ngasuh kitai nyau ngiga kunteriktor bukai ngaduka projek,” ku iya.
Abang Johari mantaika inisiatif nya rambau Pengawa Bejadika Seminar Nyungkak Industri Berumah Sarawak ba Palan Aum Besai Borneo Kuching (BCCK) ditu tadi.
Iya madah, entara projek bukai ti bepenanggul iya nya perambu ngaga enggau nembuka Muzium Pemansang Limbang: Galeri Sejarah Opis Pengatur Pengawa Limbang, Sarawak ti tejanggal setaun.
