KUCHING: Unit Komunikasyen Perintah Sarawak (UKAS) diperambu masuk Institut Akhbar Malaysia (MPI) nyadi sebagi ari inisiatif nambah profesionalisme pemberita di kandang menua tu.
Sapit Menteri di Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, pemberita meseti semampai ngulu latih profesional nentuka ripot nya ukai semina bisi kualiti tang bisi kredibiliti tinggi.
Ku iya, latih nya beguna endar dikena napi bemacham pemar baka pengerembai penerang bula, petenah sereta sentiment raban bansa ti suah nyadi kelebih agi entara ‘pemberita netizen’ di media sosial.
“Aku merambu UKAS nyadi kaban MPI ngambi ulih nyendiaka pelasar kitai ngatur bemacham program penyedar, mungkur nembiak ti bisi ati nyadi pemberita tauka pemekuh media ba bemacham pelasar.
“Udah nya, kitai deka nguji ngatur sekeda program khas ungkup pemberita di Sarawak,” ku iya.
Abdullah madah munyi nya lebuh dirandau pemberita pengudah ngatur penemuai basa ngagai Tuai Pemegai Menua (TYT) Sarawak, Tun Pehin Sri Dr. Wan Junaidi Tuanku Jaafar sereta bini, Toh Puan Datuk Patinggi Fauziah Mohd Sanusi, ditu kemari.
Ba penemuai nya, Abdullah madah ke Tun Wan Junaidi udah ngansak UKAS ngambi bekerejasama rat enggau MPI sereta institusyen pemberita bukai lalu naka ulih nentuka komuniti enda nerima berita ti tau meri pengirau ati.
Nambah ke nya, ku iya, Tun Wan Junaidi mega ngemeratka pemesai guna nyaga pengelantang pemberita kelebih agi di Sarawak, ti meseti diberi perati.
“Iya (Tun Wan Junaidi) mega minta perintah berundingka pengawa meri sekularship nengah Yayasan Sarawak ngagai sida ti bisi ati nampung pelajar tauka ngulu kus profesional dalam pemberita dikena ngansah pengelandik enggau penemu sida,” ku iya.
Nangkan nya, Tuai Pegawai Eksekutif MPI, Ainol Amriz Ismail madah ke sida ngesan tanggungpengawa nyadi nalan belatih nentuka pemberita nitih standard ti ditetapka ejensi perintah.
Ku iya, siku pemberita meseti nemu sukut pemberita ti bendar nyengkaum etika nentuka sida ulih bejalaika pangku pengawa enggau penuh profesionalisme.
Sama datai ba penemuai iya nya Presiden MPI, Datuk Yong Soo Heong sereta Menijar Besai MPI, Norlida Jamain.-EDISI UKAS
