Pemar nyadi siku anak tuai enggau indai tunggal nupi dua iku anak ti agi mit enda ngelemika semangat Lidiana Dawi, 37, ransing agi ngemansangka tikas pengidup diri ngambika teulihka pemujur sebaka enggau orang bukai.

Ngembuan juluk ati ti tinggi, indu asal Lubok Antu nya ngelaika ulah ingin belajar enggau gawa bebendar deka meri penatai pemisi ti manah taja pan nujah ‘bara api’ dalam pengidup.

Lidiana tampak agi dikangau Diana madahka pejalai pengidup iya penuh enggau chura ti ngujungka iya tama dalam dunya pemajik gamal.

Diana madahka iya semina siku kuli ti bejual kereban golf di Singapore lebuh agi biak suba.

Taja pan dipeda suah ngendas ai mata lebuh ngenang kisah pengidup iya, Diana chukup kemerah nyerita pengidup diri dikena meri inspirasyen ngagai bala indu di luar din.

“Pemuntan dalam rumah tangga mejal aku pulai ke menua ngusung ruang bilik seraya ngiga pengawa bukai.

“Maya nya, aku nadai ngembuan nama-nama kelimpah ngibun anak ti agi mit ke alai aku nyau minta saup apai indai nyaga seduai laban aku mesti keluar ngiga jereki,” ku iya bejaku ngagai Suara Sarawak lebuh bejadika pengawa muka Palan Pemajik Gamal Kumang Baik Diana D di Pines Square MJC kena 15 Mei tu tadi.

Ku iya, pengudah pulai ke Sarawak, Diana bulih pengawa di sebuah kedai kosmetik tang semina ungkup enam bulan aja laban palan nya ditutup.

Baka ti udah ga labuh ditinggang ga lesung, Diana enggai nyadi enda ngiga pengawa baru dikena ngiga belanja nampung pengidup sida sebilik.

“Aku bejuang, aku ngambi pengawa belagu dikena neruska pengidup seraya ngiga pengawa bukai nyentukka aku bulih pengawa dalam bidang pemajik gamal di Stapok.

“Pejalai aku dalam bidang tu berengkah maya nya, lebuh aku bulih pengaji enggau pengajar ti ngembuan lebih 20 taun peneleba dalam bidang pemajik gamal.

ORANG TI JAMPAT BELAJAR

“Aku siku indu ti jampat belajar enggau bebendar gawa, mayuh peneleba ti diulih aku taja pan kurang setaun aku ngiri penemu enggau iya,” ku Diana.

Tang, sapa nyangka Diana ditinggang penanggul sekali agi lebuh indai ti dikesayau sakit balat, ngujungka iya suah ngambi kemisi enggau enda datai gawa.

Pekara nya, lalu muka runding Diana ngiga jalai mutarka penanggul pengidup sida sebilik.

“Aku berunding, baka ni chara deka mutarka penanggul tu, nyentukka aku meda peluang belajar ba bidang pemajik gamal ari sebuah akademi ti bekerejasama enggau pakar pemajik ari menua China.

“Maya nya, semina aku siku aja Bumiputera ti tama akademi, jaku ti dikena pan Jaku China, taja enda nemu seleka aku mejal diri belajar meda ari gaya tubuh enggau jari pengajar.

“Ungkus tama akademi tu pan kelalu mar, aku nguna semua duit simpan lebuh gawa ba Singapore suba nyengkaum ngadai emas ngagai kedai ketegal keran deka belajar semua utai tu,” ku iya.

Ku Diana, berekat penyabar sepengelama setaun belajar iya nguji tama dalam dunya dagang pemajik gamal belubah.

“Urung taun 2017 aku mutus ati nyuwa sebuah rumah atas kedai di MJC Batu Kawa ti ngembuan dua buah bilik.

“Sebuah bilik diias aku memanah nyadi palan endur aku bedagang, lalu sebuah agi nyadi bilik endur aku tinduk.

“Nyema nadai pengawa di Kuching tauka nadai orang nguna servis aku ditu, dia aku deka belelang ke Johor Baharu, Bintulu, Miri, Sri Aman, Betong, Engkilili, Lubok Antu enggau serata Sarawak ngiga penguna servis,” ku iya.

BENDAR NGANGKATKA NAMA DIRI

Ku Diana, maya nya iya bendar ngangkatka nama diri awakka dikelala mensia mayuh enggau ngulihka pechaya orang laban ti agi baru dalam bidang nya.

“Aku nadai hari ninga jaku petenah, jaku jai enggau jaku negatif orang ti deka ngelabuhka dagang aku tu.

“Nya penguji aku, kala mega aku ninga jaku jai orang, kekadang asai deka badu, kekadang asai deka mai diri ngagai Singapore baru meh tudah aku, tang aku enda ulih ninggalka menua tu,” ku iya.

Nyentukka iya nerima peminta muka kedai suwa ari pemungkal chap Logan, Mevlyn Leely di MJC, Batu Kawa.

Kelimpah kiruh bedagang, Diana mega chakah ngelatih bala indu ti deka belajar dalam bidang tu di serata Sarawak.

Enggau bekal peneleba sereta penemu ari akademi, Diana mujur ngeluarka mayuh raban indu dalam bidang pemajik gamal nyentukka sida ulih muka kedai kediri empu.

Diana madahka, apai, menyadi indu enggau anak nyadi penyukung iya datai ngagai tikas ti menyana diatu.

“Enti nitihka ati sigi enggai meh aku ngenusah apai indai tang aku nadai chara bukai.

“Sigi apai ti nganjung aku kin kia laban aku enda nemu deriba suba, tambah mega aku enda nemu deka ngarapka sapa agi.

“Kekadang aku numpang van enggau bas, taja pan mar aku berasai gaga laban diberi Tuhan bala bakih ti manah,” ku iya.

BERASAI TEMEGAH ATI

Taja napi mayuh penanggul, Diana berasai temegah laban ulih muka sebuah palan pemajik gamal ti dikumbai Palan Pemajik Gamal Kumang Baik Diana D.

Diatu iya dibantu empat iku pekereja lalu palan nya dibuka ninting hari berengkah pukul 9.00 pagi nyentuk pukul 7.30 malam.

Diana nangkan nya ngelalau ngambi semua bansa Bumiputera tebuka runding ngaul diri dalam dagang pemajik gamal ti mayuh agi dikerembaika bansa China.

“Aku ngarapka semua orang maju ke mua laban semua orang ulih mujur.

“Palan Pemajik Gamal Kumang Baik Diana D tu pemungkal baru ngagai pengidup aku enggau aku pechaya jereki nya datai ari Tuhan.

“Gaga meh kelai diri empu, mesti nyadi orang ti kreatif, ngaga mayuh promosyen enggau besemekih mega enggau chara ti manah,” ku iya.

Mensia mayuh ti deka nemu servis pemajik ti disediaka Palan Pemajik Gamal Kumang Baik Diana D ulih ngelawa facebook iya empu iya nya Sakura Diana Dawi New enggau page facebook Kumang Baik Embroidery and Beauty Services.