KUCHING: Peminta SCALE Sarawak Cohort 3 diatu dibuka, nampung misyen negap dagang anak Sarawak nengah iring mentor bepeneleba, woksyop praktikal enggau rentayan strategik.
Pengudah dua taun ngemansang ekosistem dagang ti mujur, Tabung Ekonomi Gagasan Anak Sarawak (TEGAS) enggau Endeavor Malaysia bekerejasama ungkup edisyen 2026 ti nyendia program manah agi dibanding taun ti udah.
Sapit Menteri Perambu Mengeri, Pengatur Tanah enggau Rampa Menua Sarawak ti mega Chairman TEGAS Datuk Len Talif Salleh madah, kerejasama tu ditanggam dikena nempa serikat ti beretan enggau ulih mansang kelimpah ngadu inovasyen sereta ngemujur ekosistem dagang nengeri ti majak mansang.
“SCALE Sarawak 2026 tu mandangka komitmen meruan ngagai transfomasyen ekonomi Sarawak enggau negap pemungkal nengah iring mentor sereta rentayan ti besai reti.
“Inisiatif tu nipak Strategi Pemansang Pengudah COVID-19 2030 (PCDS2030) sereta Pelin Besai Ekonomi Digital Sarawak 2030 seraya ngamat visyen nempa ekosistem ti maju enggau inovatif,”terang iya.
Nangkan nya, Direktor Atur Pengawa Endeavor Malaysia Shan Li Tay madah, kerejasama enggau TEGAS ukai semina bekaul pemansang dagang.
“Tang nya ngempuru pedagang ba Sarawak enggau komuniti ti engkeman enggau nyendia pelasar strategik ti diguna dikena mai inovasyen menua ngagai renggat global.
“Kami temegah ulih bejalaika pengawa ngemansang rebak baru pedagang Sarawak ti deka ngemudi transfomasyen ekonomi nengeri tu,” ku iya.
Kohort ti deka datai tu deka nyukung tujuh serikat sepanjai timpuh enam bulan ngena kurikulum ti entap agi dibanding taun ti dulu.
Sekeda pekara dikemanah deka diadu ungkup kohort sekali tu nyengkaum enam woksyop fizikal, sesyen ngembing beraban sereta dua sesi panel dagang ti berurun.
Nambah ke nya, program tu ngiga serikat pemungkal ba Sarawak ti nitih sekeda penteba nyengkaum abis nadai siku pemungkal begulai meseti anak Sarawak kelimpah meseti bisi hak reta intelek ungkup produk tauka servis sida.
Dagang nya mega meseti nunjukka pemansang operasyen enggau penatai pemisi ninting taun abis mimit RM500,000.
Kelimpah ari nya, serikat pemungkal nya meseti bisi fokus inovasyen sekali ke nyadi dagang bepelasarka teknologi tauka ngena teknologi nyadi penyungkak besai sereta nunjukka pengulih pemansang enggau visyen ti nyengala dikena ngerembai operasyen, makit tauka produk sida.
Timpuh peminta enggau dipantis belabuh ari 10 Februari nyentuk 30 April 2026 ke alai pemungkal ti dipilih deka diserenih sebedau Hari Bejadi ba Perkampungan Digital TEGAS kena 4 enggau 5 Mei tu.
Pedagang ti bisi ati ulih nganjung peminta ba bit.ly/SCALEsarawak2026 ngambi ngulu komuniti ti disukung mentor tikas global ari serikat baka Carsome, FarmFresh enggau JurisTech.
