KUCHING: Projek Taba Tugung Sampah Baru Opar deka ditampung ba Langgur Pemansang Malaysia Lumpar Ke-12 (RMK12), ku Menteri Muda Kaunsil Kandang Menua enggau Pengawa Berumah Datuk Dr Penguang Manggil.
Ku iya, Kaunsil Pelilih Lundu (MDL) udah minta sereta mantaika agih belanja tambah beungkus RM37 juta dikena nembuka projek nya ba baruh RMK12.
“Projek ti dikemansang di baruh RMK11 nya enda ulih ditembu nitihka taga laban agih belanja keterubah beungkus RM5 juta enda umbas dikena nangkup pejalai projek nya.
“Berindik ari nya, MDL ti nyadi tiang sukung ngagai projek tu udah mantaika baru projek tu lalu minta agih belanja beungkus RM37 juta ngambika taba muai sampah renggat tiga ulih dikemansang ke guna MDL sereta Kaunsil Pelilih Bau (MDB) di baruh RMK12,” ku iya.
Penguang madah munyi nya lebuh nyaut tanya ari Adun Tanjung Datu Datuk Amar Jamilah Anu bekaul enggau pemansang projek Taba Tugung Sampah Baru Opar ba Aum Kedua Renggat Kelima Dun Ke-18 ditu, kemari.
Nangkanka nya ku iya, semina sekeda ari pengawa ulih dipejalai ungkup projek nya ngena agih belanja keterubah beungkus RM5 juta.
“Tu nyengkaum pengawa nyukat kelingi enggau topografi, pengawa ngulihka tanah, bayar pampas, pansik ngagai taba tanah, ngemanahka jalai akses ngagai taba projek sereta pengawa nembuka langkar enggau dokumen tender,” ku iya.
Berebak enggau nya ku iya, belanja ari RM5 juta nya nyengkaum RM300,000 ti dikena ungkup pengawa sukat kelingi enggau topografi, RM4.5 juta ungkup bayar pampas tanah enggau utai tanam, pansik tanah (RM100,000), pengawa ngaga jalai akses (RM1 juta) sereta chengkeram, konsultan enggau dokumen tender (RM1 juta).
