Pemintar ngemai pemedis

KUCHING: Pemintar runding siku orang tuai belajar ngaga senapang angin belalauka penerang ari Google semina manjuk diri empu pengudah iya ditan polis.

Ku Ketuai Polis Pelilih Kuching Asisten Komisioner Awang Din Awang Gani, saspek beumur 60 taun nya ditan ba sebuah lot rumah kedai di Jalai Mendu urung pukul 6.45 lemai, Hari Dua tu tadi.

“Saspek ditemu ngibun tiga laras senapang angin digaga iya empu enggau sekeda leka guli dipelaba nyadi seterum,” ku iya nerang.

Awang Din madah, saspek diau kediri sereta gawa nyadi pengereja bukai.

“Tuju iya ngaga senapang angin tu laban deka nyaga diri.

“Iya belajar ngaga senapang angin tu ari penerang ba Google,” ku iya nerang.

Awang Din madahka saspek mega ngembuan rikod sekeda penyalah sebedau tu.

Iya diatu ditan lalu dipansik di baruh Seksyen 8(A) Akta Senjata Api 1960.

MEDIS DIRI… Tiga senapang angin ti dirampas.