SEMAMPAI fokus sereta ngansah bakat enggau pengelandik diri entara kunchi tauka resia pemujur Mel Vianna Lai pengudah menggi gelar Mrs Petite Global Malaysia 2023.

Mel Vianna Lai ti tampak agi dikangau Mel Vianna, 39, asal ari Bintulu mega udah menggi gelar bukai baka Darling of The Crowd, Popular Award, Best Evening Gown enggau Social Media Award.

“Resia ari aku nya, giga jurulatih ti manah matih kita lalu kita mega meseti bagas belatih.

“Aku belatih ninting hari bejaku ba mua cheremin bekaul topik enggau isu ti nyadi kemaya hari tu.

“Aku endang rindu masuk pekit pemajik gamal laban minat ba pekara pemajik enggau pisin indu.

“Tang suba empai bisi pemerani enggau pengandal bejaku ba mua bala mayuh.

“Ari nya, aku deka nguji enchabar diri laban enti ukai diatu kemaya agi?

“Ukai semina nya aja, nyawa ti nyarih beguna endar ngambi kitai tampak bisi pengandal bejaku ba atas panggau enggau ba mua bala mayuh kelebih agi bala akim.

“Nyau ngenang terubah masuk pekit pemajik gamal, bendar tudah aku mansal diri ngambi berani bejaku ba mua bala mayuh.

“Tang bai pengingin ati, dia aku bebendar muai pengasai ati ti malu sereta belatih belama sereta ngansah pengelandik ba bemacham pekara baru.

“Ba genap pengawa dikereja kitai udah tentu lelak tang kitai meseti ngembuan runding enda mudah mantul ngapa seagi enda tepantup ba bandir,” ku Mel Vianna ngepunka randau.

Nampung randau, Mel Vianna ngelalau raban indu sekali ke bujang tauka udah kawin bisi pengandal masuk pekit pemajik gamal sereta ngembuan runding nyadika pekit tu pelasar matih pengandal enggau pemerani kita ba mua bala mayuh.

Ari siku orang ti malu, Mel Vianna madahka diri nyau berani bejaku ba mua bala mayuh.

Iya mega madahka diri mayuh belajar chara berandau sereta baka ni mai diri lalu pekit tu endang ngubah aku nyadi siku ti lebih andal ngagai diri empu.

JAKU PERANSANG

“Utai ti seruran dikeingat aku nya semampai fokus enggau pengawa dikereja kitai.

“Ba pekit Mrs Petite Global Malaysia 2023, aku fokus 100 peratus lalu minat belajar nyentuk datai ba pekit tu.

“Aku belatih lalu belajar ari pakar baka chara bejalai tauka dikumbai catwalk nyentuk nempa mayuh pemujur.

“Aku enda ngadang ulih nempa pemujur ti chukup ngemegah tu,” ku iya nyemetak.

Mel Vianna mega madah, tuju iya masuk pekit tu laban deka nguji seraya ngansah pengelandik diri bejaku ba mua bala mayuh.

Ukai semina nya aja, iya mega deka ngemegah Sarawak, raban bansa Iban enggau sida sebilik ngambi majak dikelala.

Tuju pemadu manis ari Mel Vianna masuk pekit nya deka mantu sida ti kurang benasip manah sereta marit orang bukai ngembuan penyiru mantu orang bukai.

Ngelansa pasal sapa ti nyadi idola tauka orang ti meransang, dia Mel Vianna madahka diri ngaku niang Puteri Diana nyadi idola.

Ku iya, niang Puteri Diana tu ukai orang kaya nyentuk kawin enggau anak Raja lalu nyadi Puteri Britain.

Iya ukai semina bajik tang ngembuan penyelai kediri empu sereta siku orang ti dikelala chukup ngemaruhka diri, manah ati enggau gerah jari mantu orang ti tusah keberuran ba menua Afrika kelebih agi Ethopia.

Ari penyiru nya ku Mel Vianna, niang Puteri Diana udah bejalai ngelingi dunya mantu anak patu balu sereta orang ti seranta.

“Semangat dikembuan iya mantu orang ti tusah udah nyadi peransang ngagai aku naka ulih mantu orang bukai ti kurang benasip manah,” ku Mel Vianna.

BETATI NASIP NEMBIAK MIT

Pengawa mantu orang bukai tu endang pengawa ti tuchi lalu patut dikemeran semua orang ngambi genap orang dikelala kitai nya bulih pengaga enggau pengelantang ba pengidup.

Nya meh pengawa ti chakah dipejalai Mel Vianna diatu kelebih agi mantu raban nembiak mit ngambi sida semampai ngasaika diri dikeibuh lalu dikenati.

“Pengawa ke pemadu suah dikereja aku nengah pekit tu iya nya mantu nembiak mit kurang benasip kelebih agi nembiak mit nyelai pendiau (OKU).

“Lebuh pengerekai igi penyakit COVID-19, aku suah ngatur donation drive bekerejasama enggau RUMAH K.I.D.S Gerempung Rumah Nembiak Mit Di Kesayau (www.rumahkids.com, Mr Davis Jansen Nathan).

“Pengawa tu ditampung aku nyentuk diatu ngambi sida bisi endur ngasaika pengerindu enggau penyayau sereta disedia pemakai ti chukup.

“Engka aku enda ulih nulung semua tang besai pengarap pengawa dikereja aku tu ulih ngubah nasip nembiak mit.

“Aku mega suah mantu raban ti ngintu jelu lelang tauka dipenyati baka mayau, ukui enggau ke bukai lalu bekerejasama enggau bemacham raban,” terang iya.

KENANG MANIS

Nampung randau ke dalam, Mel Vianna bisi bekunsi kenang manis lebuh ulih betemu enggau diri sebilik sereta kaban belayan datai jauh ari Sarawak mai tambai ke Kuala Lumpur kelai meri sukung ngagai iya.

“Temegah sereta sinu meda diri sebilik enggau kaban belayan sanggup datai jauh nyukung pengawa ti chukup dikerindu aku.

“Aku mega berasai gaga ulih betemu enggau bakih baru ari selampur Malaysia nengah Pekit Mrs Petite Global Malaysia 2023.

“Taja kami besemekih ba atas panggau tang kami semampai meri semangat enggau peransang ngagai pangan diri lalu meruan bebakih taja pekit udah tembu.

“Kelimpah masuk pekit pemajik gamal, aku mega minat pengawa pemajik enggau pisin ke alai suba aku bisi produk kosmetik kediri empu.

“Tang projek nya puntan berindik ari saintis ti bekerejasama enggau aku nya sakit lempuang ngujungka pemansut produk nya enda ulih dipujur.

“Aku mega bisi nguji enggau ngeruh ai ba dagang Eyelashes enggau Eyebrow.

“Pengudah dipenggi Mrs Petite Global Malaysia 2023, aku benung ngaga dua produk baru di baruh chap dagang aku empu dikumbai CareLoyal ngena lambang Crowd Mrs Petite Global Malaysia 2023,” ku iya.

Ngelansa silik produk nya, Mel Vianna madahka kededua produk nya ari sarang burung (Swiftlet Birdnest).

Ba Mel Vianna, produk sarang burung nya ngembuan seribu pemanah ungkup pemajik enggau pengerai orang indu laban sejarah sarang burung ti udah lama ditemu ba menua China.

NYAGU NAMA, RABAN BANSA

Lebuh ditanya pengelebih tauka pemanah ngangkat adat enggau main asal kitai Iban, ba penemu Mel Vianna, pengawa ngangkat adat asal kitai chukup manah kelebih agi nengah pekit pemajik gamal ba renggat nasional tauka antarabansa.

“Aku temegah nyadi anak Iban ti ulih ngangkat penyelai adat enggau main asal kitai ngambi majak dikelala ba Semenanjung Malaysia lalu udah tu ba tikas dunya.

“Nengah pekit empai lama, aku mega ulih bekunsi adat enggau main asal kitai Iban ngagai bala bakih asal ari Semenanjung.

“Nyau datai ba pengujung randau tang aku deka nerang mimit pejalai aku udah tu ba pekit dunya ila, nyadi aku baru menang pekit tu urung sebulan ke udah lalu diatu diatu benung nyikap diri ngagai pekit antarabansa.

“Laban empai sedia, dia aku ngaga pemutus deka masuk pekit Mrs Petite Global International ba taun 2025.

“Kebuah pia laban tiga bulan agi timpuh nya lalu aku bisi perambu ngemansangka dagang ba taun baru.

“Nya kebuah aku ngaga pemutus baka nya laban deka ngaga promosyen ungkup produk diri lalu ngarapka diri ulih nyadi pemelanja ba pekit pemajik gamal seraya ngelaku produk,” ku iya nyimpul randau.